ໃນວັນທີ 22 ສິງຫາ 2025 ທີ່ຫໍປະຊຸມໃຫຍ່ຂອງແຂວງອັດຕະປື ໄດ້ຈັດພິທີປາຖະກະຖາ ວັນຍຶດອໍານາດທົ່ວປະເທດ ຄົບຮອບ 80 ປີຄື: ວັນທີ 23 ສິງຫາ 1945-23 ສິງຫາ 2025 ແລະ ຄົບຮອບ 50 ປີ ວັນທີ 23 ສິງຫາ 1975-23 ສິງຫາ 2025, ໃຫ້ກຽດປາຖະກະຖາໂດຍທ່າານ ພັນເອກ ຈັນທະໜາ ກົມມະເມືອງ ຮອງປະທານສະຫະພັນນັກຮົບເກົ່າ ແຂວງອັດຕະປື, ມີຄະນະພັກ-ຄະນະນໍາ, ພະນັກງານຫຼັກແຫຼ່ງ, ພະນັກງານລັດຖະກອນພະແນກການອ້ອມຂ້າງແຂວງເຂົ້າຮ່ວມຮັບຟັງ.
ທ່ານ ພັນເອກ ຈັນທະໜາ ກົມມະເມືອງ ຮອງປະທານສະຫະພັນນັກຮົບເກົ່າແຂວງອັດຕະປື ໄດ້ຍົກໃຫ້ເຫັນເຖິງຄວາມສໍາຄັນຂອງວັນຢຶດອໍານາດ23 ສິງຫາ ປີ 1945 ແລະ 23 ສິງຫາ ປີ 1975 ມີວັນທີ່ມີຄວາມໝາຍຄວາມສໍາຄັນສໍາລັບປະຊາຊົນລາວທັງຊາດ ເພາະມັນແມ່ນໝາກຜົນແຫ່ງການຕໍ່ສູ້ປະຕິວັດ ອັນຢືດເຢື້ອຍາວນານ ຂອງປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກ ປະຊາຊົນປະຕິວັດລາວ, ມັນແມ່ນຜົນທີ່ເກີດມາຈາກຄວາມກ້າຫານປະດິດສ້າງແຫ່ງການນໍາໃຊ້ 3 ບາດຄ້ອນຍຸດທະສາດ ເພື່ອຢຶດອໍານາດການປົກ ຄອງ ໃນທົ່ວປະເທດແບບບົວບໍ່ໃຫ້ຊໍ້າ ນໍ້າບໍ່ໃຫ້ຂຸ່ນ ແມ່ນໄຊຊະນະ ຂອງແນວທາງການປະຕິວັດອັນຖືກຕ້ອງ ແລະ ການນໍາພາອັນສະຫຼາດສ່ອງໃສຂອງພັກ ທີ່ຮູ້ໝູນໃຊ້ລັດທິມາກ-ເລນິນ ເຂົ້າໃນພຶດຕິກໍາຕົວຈິງຂອງ ການປະຕິວັດລາວຢ່າງປະດິດສ້າງ, ມັນແມ່ນໄຊຊະນະກໍາລັງແຮງແຫ່ງຄວາມສາມັກຄີ ເປັນຈິດໜຶ່ງໃຈດຽວກັນຂອງປວງຊົນທັງຊາດ, ເປັນອັນໜຶ່ງອັນດຽວກັນ ຂອງກອງທັບ ແລະ ປະຊາຊົນບັນດາເຜົ່າ, ແມ່ນໄຊຊະນະຂອງຄວາມສາມັກຄີ ຮ່ວມສໍາພັນສູ້ຮົບ ລະຫວ່າງ ປະຊາຊົນລາວ, ປະຊາຊົນຫວຽດນາມ ແລະປະຊາຊົນກໍາປູເຈຍ ທີ່ໄດ້ຄຽງບ່າຄຽງໄລ່ກັນ ຕ້ານສັດຕູໂຕດຽວກັນຕະຫຼອດໄລຍະການປະຕິວັດ ປົດປ່ອຍຊາດໃນເມື່ອກ່ອນ ກໍຄືໃນພາລະກິດປົກປັກຮັກສາ ແລະ ກໍ່ສ້າງປະເທດຊາດໃນປັດຈຸບັນ.
ພ້ອມນັ້ນ ທ່ານຍັງໄດ້ຍົກໃຫ້ເຫັນການກໍາເນີນເຕີບໃຫຍ່ຂະຫຍາຍຕົວຕະລອດໄລຍະ 75 ປີ ຂອງສື່ມວນຊົນ ແລະ ການພີມຈໍາໜ່າຍແຫ່ງຊາດ, ເຊິ່ງໃນຂົງເຂດສື່ມວນຊົນ ໄດ້ເອົາໃຈໃສ່ໂຄສະນາ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີຄັ້ງທີ IX, ວຽກງານຈຸດສຸມຂອງລັດຖະບານ, ໄດ້ໂຄສະນາເພື່ອສະກັດກັ້ນການແຜ່ລະບາດຂອງພະຍາດຕ່າງໆ, ໄດ້ໂຄສະນາຕອບໂຕ້ຂ່າວບິດເບືອນ, ການໃສ່ຮ້າຍປ້າຍສີ ຂອງກຸ່ມຄົນບໍ່ດີຢ່າງທັນການ ແລະ ວຽກງານການພີມຈໍາໜ່າຍ ກໍ່ເຫັນວ່າໄດ້ຮັບການພັດທະນາດີທັງປະລິມານ ແລະ ຄຸນນະພາບເທື່ອລະກ້າວ.
ຂ່າວ:ວັດທະນາ