ວັນທີ 18 ກັນຍາ 2025 ທີ່ສະໂມສອນຫ້ອງວ່າການເມືອງໄຊເສດຖາ ແຂວງອັດຕະປື ໄດ້ຈັດພິທີປາຖະກະຖາ ວັນຊາດ ສາທາລະນະລັດ ສັງຄົມນິຍົມຫວຽດນາມ ຄົບຮອບ 80 ປີ ຄື: ວັນທີ 2 ກັນຍາ 1945 ຫາ ວັນທີ 2 ກັນຍາ 2025, ໃຫ້ກຽດປາຖະກະຖາໂດຍ ສະຫາຍ ຄໍາບຸນ ດວງພະບາງ ຮອງເລຂາພັກແຂວງ, ມີການນໍາຂອງແຂວງ, ເມືອງ, ມີພະນັກງານ-ລັດຖະກອນ ຕະຫຼອດຮອດສະມາຄົມຫວຽດກຽວ ພາຍໃນແຂວງ ເຂົ້າຮ່ວມ.
ສະຫາຍ ຄໍາບຸນ ດວງພະບາງ ໄດ້ຍົກໃຫ້ເຫັນການກຳເນີດຂອງພັກກອມມູນິດອິນດູຈີນ ໂດຍແມ່ນປະທານ ໂຮ່ຈີມິນ ຜູ້ນຳທີ່ຍິ່ງໃຫຍ່ ເປັນຜູ້ກໍ່ຕັ້ງຂຶ້ນໃນປີ 1930, ເຊິ່ງເປັນຕົ້ນກຳເນີດຂອງພັກກອມມູນິດຫວຽດນາມ ແລະ ພັກປະຊາຊົນ ປະຕິວັດລາວໃນປັດຈຸບັນ, ພັກກອມມູນິດຫວຽດນາມ ໄດ້ກາຍເປັນຄັນທຸງນໍາພາປະຊາ ຊົນຫວຽດນາມ ພ້ອມກັນລຸກຮືຂຶ້ນຍາດເອົາໄຊຊະນະອັນເປັນປະຫວັດສາດຂອງຊາດຄື: ດໍາເນີນການປະຕິວັດເດືອນສິງຫາສໍາເລັດຜົນ ແລະ ສະຖາປະນາສາທາລະນະລັດ ປະຊາທິປະໄຕ ຫວຽດນາມຢ່າງສະຫງ່າ ຜ່າເຜີຍໃນວັນທີ 2 ກັນຍາ ປີ 1945.
ພາຍຫຼັງປົດປ່ອຍປະເທດຊາດໄດ້ຢ່າງສົມບູນ, ພັກ, ລັດ ແລະ ປະຊາຊົນຫວຽດນາມອ້າຍນ້ອງ ໄດ້ສືບຕ່ໍພາລະກິດປົກປັກຮັກສາ ແລະ ສ້າງສາປະເທດຊາດສັງຄົມນິຍົມ, ໂດຍມີຄວາມສະດຸ້ງໄວຕໍ່ສະພາບການ, ໃນໄລຍະ 80 ປີຜ່ານມາ ພັກກອມມູນິດຫວຽດນາມ ໄດ້ມີການນໍາພາລິເລີ່ມພາລະກິດປ່ຽນແປງໃໝ່ຢ່າງທັນການ, ມີຫຼັກການ, ມີບາດກ້າວທີ່ເໝາະສົມ ແລະ ມີການປະສານສົມທົບຢ່າງກົມກຽວລະຫວ່າງ ການປ່ຽນ ແປງ ໃໝ່ກັບການຮັກສາສະຖຽນລະພາບທາງການເມືອງ, ຖືເອົາການສ້າງສາພັດທະນາເສດຖະກິດເປັນໜ້າທີ່ໃຈກາງ, ເອົາການສ້າງພັກເປັນອັນຕັດສິນ, ເອົາການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ການສ້າງກໍາລັງແຮງສັງລວມໃຫ້ແກ່ປະເທດຊາດເປັນໄມ້ຫຼາວັດແທກຜົນສໍາເລັດຂອງການປ່ຽນແປງໃໝ່. ມາຮອດກອງປະຊຸມໃຫຍ່ ຄັ້ງທີ VII ຂອງພັກ ໃນປີ 1991, ພັກໄດ້ຮັບຮອງເອົາໂຄງການການເມືອງ ແຫ່ງການສ້າງປະເທດຊາດໃນໄລຍະຂ້າມຜ່ານໄປສູ່ສັງຄົມນິຍົມ.
ທັງນີ້ ກໍເພື່ອເຮັດໃຫ້ນັກຮົບ, ສະມາຊິກພັກ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າ, ລວມທັງ ສະມາຄົມຫວຽດກຽວ ພາຍໃນແຂວງອັດຕະປື ໄດ້ຮັບຮູ້ເຂົ້າໃຈ ກ່ຽວກັບມູນເຊື້ອວັນຊາດ ສສ ຫວຽດນາມ ຄົບຮອບ 80 ປີ. ພ້ອມນັ້ນ ກໍ່ເພື່ອເສີມຂະຫຍາຍມູນເຊື້ອຮັກຊາດ, ນໍ້າໃຈພິລະອາດຫານບໍ່ຍອມຈຳນົນ ແລະ ນໍ້າໃຈເສຍສະຫຼະອັນສູງສົ່ງ, ຄວາມສາມັກຄີປອງດອງກັບບັນດາປະເທດ ແລະ ການຮ່ວມມືຮອບດ້ານ ລາວ-ຫວຽດນາມ ຊຶ່ງເປັນປັດໃຈອັນສໍາຄັນ ຕັດສິນໄຊຊະນະຂອງການປະຕິວັດລາວ ແລະ ຫວຽດນາມໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍ່ຄືການສ້າງສາພັດທະນາ ຂອງທັງສອງປະເທດໃນປະຈຸບັນ.
#ຂ່າວ: ວັດທະນາ
#ພາບ: ວົງສະໄໝ