ອັດຕະປື ຮັບຮອງເອົາການສັບຊ້ອນນັກຮຽນ ໄປຮຽນຕໍ່ພາຍໃນ ແລະ ຕ່າງປະເທດ ປະຈຳສົກຮຽນ 2021-2022.

ສ້າງຂື້ນເມື່ອ ວັນຈັນ, 20 ກັນຍາ 2021 03:03
ຂຽນໂດຍ ຄອຂ ອັດຕະປື

ອັດຕະປື ຮັບຮອງເອົາການສັບຊ້ອນນັກຮຽນ ໄປຮຽນຕໍ່ພາຍໃນ ແລະ ຕ່າງປະເທດ ປະຈຳສົກຮຽນ 2021-2022.

           ວັນທີ 15 ກັນຍາ 2021 ນີ້, ແຂວງ ອັດຕະປື ໄດ້ເປີດກອງປະຊຸມຄົ້ນຄ້ວາ ແລະ ຮັບຮອງເອົາການສັບຊ້ອນນັກຮຽນໄປຮຽນຕໍ່ຢູ່ພາຍໃນ ແລະ ຕ່າງປະເທດ ປະຈຳສົກຮຽນ 2021 – 2022, ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍພາຍໃຕ້ການເປັນປະທານ ຂອງທ່ານ ບຸນເສີດ ເສດທິລາດ ຄະນະປະຈຳພັກແຂວງ, ຮອງເຈົ້າແຂວງ ອັດຕະປື, ມີ ທ່ານ ອຸດົມສິນ ສີຊານົນ ກຳມະການພັກ, ຫົວໜ້າພະແນກສຶກສາທິການ ແລະ ກິລາ ແຂວງ, ມີຫົວໜ້າ,ຮອງພະແນກການອ້ອມຂ້າງແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

           ໃນກອງປະຊຸມ ທ່ານ ກໍລະກັນ ສົມພັກດີ ຫົວໜ້າຂະແໜງສະຖີຕິ-ແຜນການ ແລະ ພົວພັນຕ່າງປະເທດ ພະແນກສຶກສາທິການ ແລະ ກິລາແຂວງ, ໄດ້ຜ່ານຮ່າງບົດລາຍງານການຈັດຕັ້ງປະຕິບັດ ການຄັດເລືອກ ແລະ ສັບຊ້ອນ ນັກຮຽນໄປຮຽນຕໍ່ ປະຈຳສົກຮຽນ 2021-2022, ເຊິ່ງການຈັດຕັ້ງປະຕິບັດການຄັດເລືອກ ແລະ ສັບຊ້ອນ ນັກຮຽນໄປຮຽນຕໍ່ ຄັ້ງນີ້ ແມ່ນໄດ້ປະຕິບັດຕາມຂໍ້ຕົກລົງເຈົ້າແຂວງໆ ອັດຕະປື ສະບັບເລກທີ1104/ຈຂ.ອປ ລົງວັນທີ 23 ສິງຫາ 2021 ວ່າດ້ວຍ ການແຕ່ງຕັ້ງ ຄະນະຮັບຜິດຊອບຄົ້ນຄວ້າຄັດເລືອກ ແລະ ສັບຊ້ອນ ພະນັກງານ ແລະ ນັກຮຽນໄປຮຽນຕໍ່ພາຍໃນ ແລະ ຕ່າງປະເທດ ປະຈໍາສົກປີ 2021 – 2022; ອີງຕາມແຜນແບ່ງປັນສັບຊ້ອນນັກຮຽນ ແລະ ພະນັກງານເຂົ້າຮຽນຕໍ່ ປະຈໍາສົກຮຽນ 2021 – 2022 ສະບັບ ເລກທີ 816/ສສກ ລົງວັນທີ 26 ສິງຫາ 2021 ແລະ ແຈ້ງການຂອງກະຊວງສຶກສາທິການ ແລະ ກິລາສະບັບ ເລກທີ 817/ສສກ ລົງວັນທີ 26 ສິງຫາ 2021 .

           ພ້ອມນີ້ກອງປະຊຸມກໍ່ໄດ້ສະເໜີ ໃຫ້ບັນດາຜູ້ແທນທີ່ເຂົ້າຮ່ວມ ສະເໜີ ປະກອບຄຳຄິດເຫັນ ໃສ່ຮ່າງບົດລາຍງານດັ່ງກ່າວ ບົນພື້ນຖານລະບຽບຫລັກການ ແລະ ມີລັກສະນະວິທະຍາສາດ ທີ່ຖືກຕ້ອງ ແລະ ສອດຄ່ອງກັບ ແຜນສ້າງຊັບພະຍາກອນມະນຸດ ເຂົ້າໃນແຜນພັດທະນາເສດຖະກິດ-ສັງຄົມຂອງແຂວງ ໃຫ້ມີຄວາມເຂັ້ມແຂງໃນຕໍ່ໜ້າ, ເຊິ່ງ ຮູບແບບການຄັດເລືອກໃນຄັ້ງນີ້ ໄດ້ແບ່ງອອກເປັນ 3 ບຸລິມະສິດ ຄື: ບຸລິມະສິດທີ 1 ນັກຮຽນເກັ່ງຕາມລາຍວິຊາໃນຂັ້ນແຂວງ ( ຄະນິດສາດ, ຟີຊິກສາດ, ເຄມີສາດ ແລະ ພາສາລາວ) ຈໍານວນ 4 ທຶນ ແລະ ນັກຮຽນເສັງຈົບຊັ້ນ ມ7 ທີ 1, ຂອງແຂວງ ຈໍານວນ 01 ທຶນ; ບູລິມະສິດທີ 2, ປະຕິບັດນະໂຍບາຍຕໍ່ການນໍາຂັ້ນແຂວງ, ພະນັກງານບໍານານ ແລະ ຜູ້ມີຜົນງານ, ບຸລິມະສິດທີ 3, ຕາມຄໍາຮ້ອງສະຫມັກໃຈຂອງນັກຮຽນ.

            ຜ່ານການສະເໜີຄຳຄິດເຫັນ, ຄົ້ນຄວ້າ ແລະ ປຶກສາຫາລື, ກອງປະຊຸມ ໄດ້ຕົກລົງເຫັນດີ ເປັນເອກະພາບຮັບຮອງເອົາຜົນການສັບຊ້ອນ ນັກຮຽນໄປຮຽນຕໍ່ຕ່າງປະເທດທີ່ ສສ ຫວຽດນາມ ປະຈຳສົກຮຽນ 2021-2022 ດ້ວຍທຶນໃນແຜນ ທີ່ໄດ້ຮັບທຶນຊ່ວຍເຫຼືອຈາກບັນດາແຂວງຂອງ ສສ ຫວຽດນາມ ມີ ທັງຫມົດ 15 ທຶນ, ມີທືນຊ່ວຍເຫຼືອຈາກແຂວງ ເທື່ອທຽນເຫ້ວ ຈໍານວນ 10 ທຶນ ແລະ ທຶນ ຊ່ວຍເຫຼືອຈາກແຂວງບິ່ງດິ້ງ ຈໍານວນ 5 ທຶນ, ໃນນັ້ນ, ໄດ້ສັບຊ້ອນນັກຮຽນເກັ່ງຂັ້ນແຂວງ ແລະ ຂັ້ນເມືອງ ຈໍານວນ 4 ຄົນ, ປະຕິບັດນະໂຍບາຍຕໍ່ລູກຫຼານ ການນໍາຂັ້ນແຂວງ, ພະນັກງານບໍານານ, ຜູ້ມີຜົນງານຈໍານວນ 10 ຄົນ ແລະຕາມຄໍາຮ້ອງສະຫມັກໃຈຂອງນັກຮຽນ1ຄົນ.

            ສຳລັບທຶນແບ່ງປັນສັບຊ້ອນນັກຮຽນໄປຮຽນຕໍ່ພາຍໃນ ທຶນຈາກກະຊວງ ສຶກສາທິການ ແລະ ກິລາແຂວງ ມີທັງ 557 ທຶນ ໃນນັ້ນ. ທຶນໄປຮຽນລະດັບມະຫາວິທະຍາໄລ ແລະ ວິທະຍາໄລ ມີ 42 ທຶນ, ມີ ນັກຮຽນເກັ່ງທີ 1 ຂອງແຂວງ (ໃນ 4 ວິຊາສອບເສັງນັກຮຽນເກັ່ງລະດັບແຂວງ) ຈໍານວນ 1 ທຶນ, ນັກຮຽນເກັ່ງ ທີ 1 ຂອງແຂວງ(ຕາມຜົນສອບເສັງຈົບ ມ7)ຈໍານວນ 1 ທຶນ, ຮຽນຢູ່ມະຫາໄລແຫ່ງຊາດ ( ປະລິນຍາຕີ) 16 ທຶນ, ຮຽນຢູ່ມະຫາໄລ ຈໍາປາສັກ ( ປະລິນຍາຕີ) 22 ທຶນ (ໃນນັ້ນທຶນນັກຮຽນຊົນເຜົ່າ 2 ທຶນ); ຮຽນຢູ່ ວິທະຍາໄລ ກະສິກໍາ ຈໍາປາສັກ ( ຊັ້ນສູງ) 2 ທຶນ, ໄປຮຽນໃນສາຍອາຊີວະສຶກສາ ໂຮງຮຽນເຕັກນິກວິຊາຊີບ ແບບປະສົມ ແຂວງ ອັດຕະປື ຈໍານວນ 515 ທຶນ, ໃນນັ້ນ ມີລະບົບຊັ້ນສູງຕໍ່ເນື່ອງຈໍານວນ 90 ທຶນ; ລະບົບຊັ້ນກາງ 12+2ຈໍານວນ 255 ທຶນ; ລະບົບຊັ້ນກາງ 9+3 ຈໍານວນ 130 ທຶນ ແລະ ລະບົບຊັ້ນຕົ້ນ 9+2ຈໍານວນ 40 ທຶນ.

ໂດຍ:ພົມວິຫານ ໄຊຊະນະ (ຂ. ອັດຕະປື).

Found a typo? Please select it and press Ctrl + Enter.