ແຂວງອັດຕະປື ປາຖະກະຖາຫວນຄືນມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 20 ປີ.

ສ້າງຂື້ນເມື່ອ ວັນຈັນ, 05 ກັນຍາ 2022 07:42
ຂຽນໂດຍ ຄອຂ ອັດຕະປື

          ວັນທີ 2 ກັນຍາ 2022; ແຂວງອັດຕະປື ຈັດຕັ້ງພິທີປາຖະກະຖາຫວນຄືນມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 20 ປີ (9/9/2002 - 9/9/2022). ຢູ່ທີ່ຫໍປະຊຸມໃຫຍ່ຂອງແຂວງ. ໂດຍການເປັນປະທານ ຂອງທ່ານ ນ. ບຸນນານ ບຸນນະແສງ ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ, ມີທ່ານ ພົນຈັດຕະວາ ກັນໄຍ ໄຊຍະສິດ ຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວ, ປະທານສະຫະພັນນັກຮົບເກົ່າແຂວງ, ມີຄະນະໝ່ວຍອົງການຈັດຕັ້ງມະຫາຊົນ ກຳມະບານ, ຊາວໜຸ່ມ ແລະ ແມ່ຍິງ ພ້ອມດ້ວຍສະມາຊິກ ເຂົ້າຮ່ວມທັງໝົດ 430 ທ່ານ, ຍິງ 222 ທ່ານ.

 

           ໃນໂອກາດດັ່ງກ່າວ ທ່ານ ນ. ບຸນນານ ບຸນນະແສງ ຄະນະປະຈຳພັກແຂວງ ໄດ້ຍົກໃຫ້ເຫັນມູນເຊື້ອ ປະຫວັດການເຄື່ອນໄຫວພິລະອາດຫານຂອງນັກຮົບປະຕິວັດ ໃນພາລະກິດຕໍ່ສູ້ຕ້ານການຮຸກຮານຂອງພວກຈັກກະພັດລ່າເມືອງຂື້ນແບບເກົ່າ ແລະ ແບບໃໝ່ ທີ່ເປັນເວລາຍືດເຍື້ອຍາວນານ, ຍ້ອນມີການນຳພາຂອງພັກປະຊາຊົນປະຕິວັດລາວ ຈຶ່ງເຮັດໃຫ້ການເຄື່ອນໄຫວປະຕິວັດຕໍ່ສູ້ໄດ້ຮັບໄຊຊະນະ, ພ້ອມກັນນັ້ນ ທ່ານຍັງໄດ້ຍົກໃຫ້ເຫັນຜົນງານການເຄື່ອນໄຫວ, ການເຕີບໃຫຍ່ຂະຫຍາຍຕົວ ແລະ ຄວາມໝາຍຄວາມສຳຄັນຂອງອົງການຈັດຕັ້ງສະຫະພັນນັກຮົບເກົ່າແຫ່ງຊາດລາວ ໃນໄລຍະ 20 ປີ ຜ່ານມາ ກໍຄືການເຕີບໃຫຍ່ຂະຫຍາຍຕົວຂອງສະຫະພັນນັກຮົບເກົ່າແຂວງອັດຕະປື.

           ທັງນີ້ກໍ່ເພື່ອຍົກສູງ ແລະ ເຮັດໃຫ້ສະມາຊິກອົງການຈັດຕັ້ງມະຫາຊົນ ໄດ້ຮັບຮູ້, ເຂົ້າໃຈພາລະບົດບາດ ສິດ ແລະ ໜ້າທີ່ຂອງສະຫະພັນນັກຮົບເກົ່າແຫ່ງຊາດລາວ, ຮູ້ເຖີງຄຸນງາມຄວາມດີ ແລະ ຜົນງານອັນໃຫ່ຍຫຼວງຂອງວິລະຊົນ, ນັກຮົບປະຕິວັດ, ທີ່ອົງອາດກ້າຫານ ແລະ ເສຍສະຫຼະເລືອດເນື້ອເພື່ອປະເທດຊາດໃນການຕໍ່ສູ້ກູ້ຊາດ ໃນໄລຍະຜ່ານມາ ແລະ ສະແດງເຖີງຄວາມເຂັ້ມແຂງເຕີບໃຫ່ຍຂະຫຍາຍຕົວ ແລະ ຄວາມສາມາດຂອງນັກຮົບເກົ່າ ຫຼື ຜູ້ທີ່ເສຍສະຫຼະທຸກຢ່າງເພື່ອປະເທດຊາດ.

Found a typo? Please select it and press Ctrl + Enter.