ອັດຕະປື ກະກຽມຄວາມພ້ອມຫລາຍດ້ານ ເພື່ອການສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ.

ສ້າງຂື້ນເມື່ອ ວັນຈັນ, 19 ກັນຍາ 2022 03:09
ຂຽນໂດຍ ຄອຂ ອັດຕະປື

ອັດຕະປື ກະກຽມຄວາມພ້ອມຫລາຍດ້ານ ເພື່ອການສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ.

       

           ທ່ານ ນາງ. ບຸນນານ ບຸນນະແສງ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ, ຮອງປະທານຄະນະຮັບຜິດຊອບຊີ້ນຳການກະກຽມສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ ຂັ້ນແຂວງ; ໄດ້ໃຫ້ສຳພາດຕໍ່ສື່ມວນຊົນແຂວງ ໃນວັນທີ 5 ກັນຍາ 2022ນີ້, ເຊິ່ງທ່ານໄດ້ໃຫ້ທັດສະນະວ່າ: ມີຄວາມຮູ້ສຶກພາກພູມໃຈ ທີ່ເຫັນໄດ້ວ່າສາຍພົວພັນ ມິດຕະພາບ ລະຫວ່າງ ສອງຊາດ ລາວ-ຫວຽດນາມ ໂດຍສະເພາະ ລະຫວ່າງ ແຂວງ ອັດຕະປື ແລະ ແຂວງ ກອນຕູມ ເປັນແຂວງແຮກສ່ຽວນັບມື້ແໜ້ນແຟ້ນຍິ່ງຂຶ້ນ ປະຊາຊົນສອງຊາດ ລາວ-ຫວຽດນາມເຄີຍມີສາຍພົວພັນມິດຕະພາບຖ່ານອ້າຍນ້ອງມາແຕ່ດຶກດໍາບັນໂດຍສະເພາະ ເລີ່ມແຕ່ປີ1930 ເປັນຕົ້ນມາ ເຊີ່ງມີພັກກອມມູນິດອິນດູຈີນ ນໍາເອົາລັດທິມາກມາເຜີຍແຜ່ຢູ່ໃນ 3 ປະເທດອິນດູຈີນນັບແຕ່ນັ້ນມາການຮ່ວມມືສຳພັນສູ້ຮົບລະຫ່ວາງ ລາວ-ຫວຽດນາມ ເພື່ອຕ້ານຈັກະພັດລາເມືອງຂື້ນທັງເກົ່າ ແລະໃຫມ່, ເນື່ອງຈາກວ່າ ລາວ-ຫວຽດນາມ ຄຽງບ່າຄຽງໄລ່ຮ່ວມສະຕາກໍາຕີສັດຕູໂຕດຽວກັນສະນັ້ນ ຕ້ອງມີຄວາມສາມັກຄີໃນການຕໍ່ສູ້ຕ້ານຈັກະພັດລາເມືອງຂື້ນຈື່ງຈະໄດ້ຮັບໄຊຊະນະ,ເພື່ອທົບທວນບັນດາມູນເຊື້ອພິລາອາດຫານໂດຍສະເພາະມູນເຊື້ອສາຍພົວພັນມິດຕະພາບອັນຍີ່ງໃຫຍ່ຄວາມສາມັກຄີພິເສດເຊີ່ງບັນພະບູລຸດສອງພັກສອງລັດ ແລະ ປະຊາຊົນສອງຊາດກໍ່ຕັ້ງຂຶ້ນມານັ້ນໄດ້ເຜີຍແຜ່ໃຫ້ແກ່ຄົນລຸ້ນໃໜ່ໂດຍສະເພາະຄົນລຸ້ນໜຸ່ມເກີດໃໜ່ໃຫຍ່ລຸນໃຫ້ໄດ້ເຂົ້າໃຈຮັບຮູ້ເຖິງປະຫັວດສາດຄວາມເປັນມາຂອງສາຍພົວພັນມູນເຊື້ອສອງພັກສອງລັດ ແລະປະຊາຊົນສອງຊາດພ້ອມກັນປົກປັກຮັກສາໜາກຜົນມິດຕະພາບອັນຍີ່ງໃຫຍ່ສາມັກຄີພິເສດໃຫ້ຢືນຍົງຄົງຢູ່ກັບປະເທດຊາດໂດຍສະເພາະໃນພາລະກິດປະຕິວັດຂອງສອງພັກສອງລັດໃຫ້ໜັ້ນຄົງທະນົງແກ່ນຕະຫລອດໄປ.

           ດັ່ງນັ້ນ,ເພື່ອເຮັດໃຫ້ການຈັດງານສະເຫລີມສະຫລອງປີສາມັກຄີມິດຕະພາບ ຫວຽດນາມ-ລາວ ປີ2022 ປີນີ້ຄື:ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ,ໃຫ້ເຕັມໄປດ້ວຍເນື້ອໃນຄວາມໜາຍອັນເລີກເຊີ່ງແລະມີບັນຍາກາດ, ທາງອຳນາດການປົກຄອງແຂວງກໍ່ໄດ້ມີຄວາມເອກະພາບໃນການກະກຽມຄວາມພ້ອມໃນວັນສໍາຄັນດັ່ງກ່າວເຊິ່ງໄດ້ສໍາເລັດຫຼາຍດ້ານ, ມາຮອດປັດຈຸບັນນີ້, ແຂວງອັດຕະປື ໄດ້ສໍາເລັດການກະກຽມຄວາມພ້ອມຄື: ສໍາເລັດການໂຄສະນາປາຖະກະຖາເຜີຍແຜ່ມູນເຊື້ອວັນສໍາຄັນດັ່ງກ່າວພາຍໃນແຂວງໄດ້ 12 ຈຸດ, ເຊິ່ງມີຜູ້ເຂົ້າຮ່ວມ 2000 ກ່ວາຄົນ, ຕິດພັນກັບການໂຄສະນາຜ່ານສື່ເຊັ່ນ: ວິທະຍຸ,ໂທລະພາບ,ວາລະສານ,ໜັງສືພິມ ແລະ ສື່ອອນລາຍຕ່າງໆ,ສໍາເລັດການຢ້ຽມຢາມພົບປະແລກປ່ຽນກັບບັນດາແຂວງພາກກາງ, ພາກໃຕ້ຂອງ ສສຫວຽດນາມ ນັບແຕ່ຄະນະນໍາຊັ້ນສູງຂອງແຂວງ, ບັນດາອົງການຈັດຕັ້ງມະຫາຊົນຕະຫຼອດຮອດບັນດາພະແນກການອອ້ມຂ້າງແຂວງ ແລະ ເມືອງ ທີ່ມີຊາຍແດນຕິດຈອດ, ທີ່ມີການຮ່ວມມື, ສໍາເລັດການເຂົ້າອວຍພອນກົງສູນໃຫຍ່ ສສ ຫວຽດນາມ ທີ່ປະຈໍາຢູ່ນະຄອນປາກເຊ, ສໍາເລັດການເຂົ້າຮ່ວມງານວາງສະແດງສິນຄ້າຕ່າງໆທີ່ ລາວ ແລະຫວຽດນາມ ຈັດຂຶ້ນທີ່ຕິດພັນກັບວັນດັ່ງກ່າວ, ສໍາເລັດການກະກຽມງານສະເຫຼີມສະຫລອງເຊິ່ງແຂວງອັດຕະປືໄດ້ກຳນົດເອົາ ວັນທີ 9 ກັນຍາ 2022 ນີ້ເປັນມື້ເປີດງານວາງສະແດງສິນຄ້າ, ການທ່ອງທ່ຽວເປັນພິທີເປີດຢ່າງເປັນທາງການ ແລະ ສໍາເລັດການກະກຽມງານມິດຕິ່ງໃຫຍ່ເຊິ່ງຈະໄດ້ເຊື້ອເຊີນແຂກຈາກ ສສ ຫວຽດນາມ ເປັນຕົ້ນແມ່ນຈາກແຂວງກອນຕູມທີ່ເປັນແຂວງແຮກສ່ຽວ ແລະ ການປະດັບປະດາເທດສະບານແຂວງເປັນຕົ້ນ: ການຕິດທຸງຊາດ ລາວ-ຫວຽດນາມ, ບັນດາຄໍາຂວັນແຕ່ລະພະແນກການແມ່ນຕິດສໍາເລັດ, ພ້ອມກໍ່ໄດ້ກຳນົດເອົາວັນທີ 12 ກັນຍາ 2022 ເປັນມື້ຈັດພິທີໂຮມຊຸມນຸມ.

            ສໍາລັບກິດຈະກຳການວາງສະແດງສິນຄ້າ ແລະ ການທ່ອງທ່ຽວຈະເລີ່ມຕົ້ນແຕ່ວັນທີ 9-14 ກັນຍາ 2022 ມີກິດຈະກໍາເຂົ້າຮ່ວມເກືອບ 70 ຮ້ານ, ທັງພາຍໃນ ແລະ ຕ່າງປະເທດພ້ອມນີ້ຍັງຈະໄດ້ມີງານແລກປ່ຽນສິນລະປະວັດທະນະທໍາ, ມີເທດສະການອາຫານທີ່ເປັນເອກະລັກ ລາວ-ຫວຽດນາມ ຈາກຫົວໜ່ວຍທຸລະກິດທີ່ໄດ້ມາເຄື່ອນໄຫວ ແລະ ດຳລົງຊີວິດຢູ່ພາຍໃນແຂວງອັດຕະປື ໃຫ້ເຕັມໄປດ້ວຍຄວາມໝາຍຄວາມສໍາຄັນ ແລະ ມີບັນຍາກາດຟົດຟຶ້ນ.

ຂ່າວ:ມະນີວອນ

Found a typo? Please select it and press Ctrl + Enter.