ໃນວັນທີ 4 ສິງຫາ 2025ນີ້, ແຂວງອັດຕະປືໄດ້ຈັດກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ14 ສະໄໝທີ XI ຢ່າງເປັນທາງການ. ພິທີດັ່ງກ່າວໄດ້ຈັດຂຶ້ນທີ່ຫໍປະຊຸມໃຫຍ່ຂອງແຂວງອັດຕະປື, ໂດຍການເປັນປະທານຂອງ ສະຫາຍ ຄໍາບຸນ ດວງພະບາງ ຮອງເລຂາພັກແຂວງ (ຜູ້ປະຈໍາການເລຂາພັກແຂວງ) ,ມີບັນດາສະຫາຍ ອາດີດການນຳຂອງແຂວງ, ບັນດາສະຫາຍ ຮອງເລຂາພັກແຂວງ, ຄະນະປະຈໍາພັກແຂວງ, ບັນດາສະຫາຍ ກໍາມະການພັກແຂວງ, ບັນດາສະຫາຍ ເລຂາຄະນະພັກຮາກຖານ, ເລຂາໜ່ວຍພັກ, ຫົວໜ້າພະແນກການອອ້ມຂ້າງແຂວງ, ຄະນະພັກກອງບັນຊາການປກຊ, ປກສ ແຂວງເຂົ້າຮ່ວມ.
ສະຫາຍ ຄໍາບຸນ ດວງພະບາງ ຮອງເລຂາພັກແຂວງ (ຜູ້ປະຈໍາການເລຂາພັກແຂວງ)ໄດ້ກ່າວໄຂກອງປະຊຸມຄັ້ງວ່າ: ໂດຍປະຕິບັດຕາມກົດລະບຽບພັກປະຊາຊົນປະຕິວັດລາວ ແລະ ແຜນດໍາເນີນງານ ຂອງອົງຄະນະພັກແຂວງ ຄັ້ງທີ XI ກອງປະຊຸມຄົບຄະນະ ບໍລິຫານງານພັກແຂວງ ເປີດກວ້າງ ຄັ້ງທີ14 ສະໄໝທີ XI ໃນທ່າມກາງບັນຍາກາດ ທີ່ທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ເວົ້າລວມ, ເວົ້າສະເພາະແຂວງອັດຕະປື ພວມຂຸ້ນຂ້ຽວຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ ໄລຍະມ້ວນທ້າຍ; ຄຽງຄູ່ກັບການອອກແຮງແຂ່ງຂັນ ສ້າງຜົນງານ, ສ້າງຂະບວນການດ້ານຕ່າງໆ ເພື່ອຂໍ່ານັບຮັບຕ້ອນການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກແຂວງ, ໂດຍສະເພາະ ການກະກຽມຂໍ່ານັບຮັບຕ້ອນໃຫ້ແກ່ກອງປະຊຸມໃຫຍ່ ຜູ້ແທນ ອົງຄະນະພັກແຂວງ ຄັ້ງທີ XII ທີ່ຈະໄຂຂຶ້ນໃນເວລາອັນໃກ້ນີ້ ແລະ ການກະກຽມສະເຫຼີມສະຫຼອງ 3 ວັນປະຫວັດສາດ ຢ່າງເປັນຂະບວນຟົດຟື້ນ ກວ້າງຂວາງ ແລະ ມີຜົນສຳເລັດຢ່າງຕໍ່ເນື່ອງ; ພ້ອມດຽວກັນນັ້ນ, ບັນດາອົງຄະນະພັກ, ຮາກຖານພັກອອ້ມຂ້າງແຂວງ ແລະ ເມືອງ ທີ່ສໍາເລັດກອງປະຊຸມໃຫຍ່ແລ້ວ ກໍ່ໄດ້ສຸມໃສ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຂັ້ນຂອງຕົນ ຢ່າງເປັນເຈົ້າການ; ຮາກຖານພັກທີ່ບໍ່ທັນສໍາເລັດ ກໍ່ໄດ້ຂຸ້ນຂ້ຽວ ກະກຽມ ແລະ ດໍາເນີນກອງປະຊຸມໃຫຍ່ຂັ້ນຕົນ, ຊຶ່ງເຮັດໃຫ້ຫຼາຍຮາກຖານມີຜົນສໍາເລັດເປັນກ້າວໆ;
ໃນໄລຍະ 6 ເດືອນຜ່ານມາ, ພາຍໃຕ້ການນຳພາ-ຊີ້ນຳ ຂອງຄະນະບໍລິຫານງານພັກແຂວງ ເຫັນວ່າມີຫຼາຍວຽກງານທີ່ສໍາຄັນ ໄດ້ຮັບການແກ້ໄຂ ແລະ ມີຜົນສຳເລັດ ໂດຍສະເພາະທົ່ວແຂວງ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ປອດໄພ, ພື້ນຖານເສດຖະກິດ-ສັງຄົມ ຂະຫຍາຍຕົວຕໍ່ເນື່ອງ, ຄວາມທຸກຍາກຂອງປະຊາຊົນ ໄດ້ຮັບການແກ້ໄຂຢ່າງຕັ້ງ ໜ້າ, ການດໍາເນີນກອງປະຊຸມໃຫຍ່ 3 ຂັ້ນຂອງພັກແຂວງ ມີຄວາມຄືບໜ້າ ແລະ ຫຼາຍຮາກຖານພັກສໍາເລັດກອງປະຊຸມໃຫຍ່ຂອງຕົນ, ການພົວພັນ, ຮ່ວມມືກັບຕ່າງປະເທດ, ອົງການຈັດຕັ້ງສາກົນ ແລະ ອື່ນໆ ໄດ້ຮັບການເສີມຂະ ຫຍາຍຢ່າງຕັ້ງໜ້າ; ຂະນະດຽວກັນນັ້ນ, ພວກເຮົາຍັງປະເຊີນ ກັບປະກົດການຫຍໍ້ທໍ້ ແລະ ສິ່ງທ້າທາຍຫຼາຍຢ່າງ ທີ່ເຄັ່ງຮ້ອນ ເປັນຕົ້ນ: ບັນຫາເສດຖະກິດມະຫາພາກຍັງບອບບາງ, ບັນຫາອັດຕາແລກປ່ຽນເງິນຕາ, ລາຄາສິນຄ້າເໜັງຕີງສູງ, ບັນຫາຢາເສບຕິດ, ການລັກລອບຊັບພະຍາ ກອນທໍາມະຊາດ, ບັນຫາທີ່ດິນ, ແຮ່ທາດ ແລະ ອື່ນໆ.ຊຶ່ງບັນຫາດັ່ງກ່າວນີ້ ພວກເຮົາໄດ້ຕັ້ງໜ້າແກ້ໄຂ ແລະ ພ້ອມກັນອົດທົນຜ່ານຜ່າ, ດ້ວຍຄວາມສາມັກຄີອັນໜັກແໜ້ນ ແລະ ຄວາມເອົາໃຈໃສ່ ຂອງບັນດາສະຫາຍ ປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຕັ້ງໜ້າແກ້ໄຂບັນຫາຕ່າງໆ.
ກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ14 ສະໄໝທີ XI ຄັ້ງນີ້, ແມ່ນຈະໄດ້ສະຫຼຸບຕີລາຄາຄືນ ການເຄື່ອນໄຫວນຳພາ-ຊີ້ນຳວຽກງານຮອບດ້ານ ຂອງອົງຄະນະພັກແຂວງ, ການນໍາພາ-ຊີ້ນໍາພັດທະນາເສດຖະກິດ-ສັງຄົມ ແລະ ງົບປະມານ, ການກໍ່ສ້າງຮາກຖານການເມືອງ ແລະ ຮັບຟັງລາຍງານ ຕິດຕາມຫາງສຽງສັງຄົມ ໄລຍະ 6 ເດືອນ ຕົ້ນປີ2025 ແລະ ທິດທາງແຜນການໃນຕໍ່ໜ້າ, ຮັບຟັງການຜ່ານບົດສໍາຫຼວດນໍາພາລວມ ຂອງຄະນະບໍລິຫານງານພັກແຂວງ ໄລຍະ 6 ເດືອນຕົ້ນປີ; ພ້ອມກັນນັ້ນ, ຍັງຈະໄດ້ພ້ອມກັນຄົ້ນຄວ້າ ປຶກສາຫາລື ແລະ ປະກອບຄວາມຄິດ ຄວາມເຫັນ ຕໍ່ເນື້ອໃນຕົ້ນຕໍ ຂອງກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ XII ເປັນຕົ້ນ: ຮ່າງລາຍງານການເມືອງ, ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X, ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານພັກແຂວງ ສະໄໝທີXI ແລະ ຈະໄດ້ດຳເນີນການສຳຫຼວດກວດກາພາຍໃນຄະນະບໍລິຫານງານພັກແຂວງຕື່ມອີກ.
ພ້ອມນີ້ທ່ານຍັງໄດ້ຮຽກຮ້ອງມາຍັງບັນດາສະຫາຍ ຜູ້ແທນກອງປະຊຸມ ຈົ່ງພ້ອມກັນຍົກສູງ ຄວາມຮັບຜິດ ຊອບ ການເມືອງຂອງຕົນ, ເຮັດໜ້າທີ່ໃນການເຂົ້າຮ່ວມກອງປະຊຸມຄັ້ງນີ້ ຢ່າງສຸດກົກສຸດປາຍ ແລະ ເອົາໃຈໃສ່ຄົ້ນຄວ້າປືກສາຫາລື, ປະກອບຄວາມຄິດຄວາມເຫັນ ຕໍ່ແຕ່ລະເນື້ອໃນ ແຕ່ລະວຽກງານ, ບັນຫາແຕ່ລະດ້ານ ໃຫ້ຈະແຈ້ງ, ເລີກເຊິ່ງ ແລະ ສອດຄ່ອງຕາມຕົວຈິງ, ພ້ອມທັງມີທາງອອກ ແລະ ມາດຕະການຈັດຕັ້ງປະຕິບັດໃຫ້ເປັນລະບົບ ແລະ ມີຜົນສໍາເລັດ; ເພື່ອຮັບປະກັນເຮັດໃຫ້ການດຳເນີນກອງປະຊຸມຄັ້ງນີ້ ມີຜົນສຳເລັດຕາມຈຸດປະສົງ ແລະ ຄາດໝາຍທີ່ວາງໄວ້;
ກອງປະຊຸມ ຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 14 ສະໄໝທີ XI ແມ່ນຈະດຳເນີນເປັນເວລາ 3ວັນ 4-6ສິງຫາ2025ຈຶ່ງຈະສໍາເລັດ.
ຂ່າວ:ມະນີວອນ