ໃນຕອນເຊົ້າ ວັນທີ 15 ຕຸລາ 2024; ທ່ານ ສໍວິສັກ ພອນມະໄລເພັດ ຫົວໜ້າຂະແໜງໂຄສະນາ-ຂໍ້ມູນຂ່າວສານ ຄະນະໂຄສະນາອົບຮົມແຂວງອັດຕະປື ພ້ອມຄະນະຮັບຜິດຊອບວຽກງານເວັບໄຊ, ໄດ້ຕາງໜ້າຄະນະພັກ, ຄະນະໂຄສະນາອົບຮົມແຂວງ ເຂົ້າຮ່ວມກອງປະຊຸມສ່ອງແສງລາຍງານການຈັດຕັ້ງເຄື່ອນໄຫວວຽກ ງານໂຄສະນາຜ່ານສື່ເອເລັກໂຕຼນິກ ” ເວັບໄຊ ” ປະຈຳໄຕມາດ lll .(ຜ່ານກອງປະຊຸມທາງໄກ). ຢູ່ທີ່ຫ້ອງປະຊຸມຊັ້ນll ຂອງຄະນະໂຄສະນາອົບຮົມແຂວງ, ພາຍໃຕ້ການເປັນປະທານ ຂອງທ່ານ ວັນຕຸລາ ຣັກນຸດ ຄະນະພັກ, ຫົວໜ້າກົມຂໍ້ມູນຂ່າວສານ, ມີຄະນະພັກ, ຄະນະນຳຂອງຄະນະໂຄສະນາອົບຮົມແຂວງ, ຄະນະຮັບຜິດ ຊອບວຽກງານເວັບໄຊ໌ ຂອງຄະນະໂຄສະນາອົບຮົມສູນກາງພັກ ແລະ ຄະນະໂຄສະນາອົບຮົມແຂວງ ພ້ອມດ້ວຍ ແອັດມິນຄະນະໂຄສະນາອົບຮົມແຂວງ ໃນທົ່ວປະເທດ ເຂົ້າຮ່ວມ.
ກອງປະຊຸມດັ່ງກ່າວ ທ່ານ ວັນຕຸລາ ຣັກນຸດ ກໍໄດ້ກ່າວເປີດພິທີ ພ້ອມທັງກ່າວຈຸດປະສົງ, ຫຼັງຈາກນັ້ນບັນດາຄະນະຮັບຜິດຊອບວຽກງານເວັບໄຊ ແຕ່ລະແຂວງ ກໍ່ໄດ້ພັດປ່ຽນກັນລາຍງານໂດຍຫຍໍ້ຕໍ່ການຈັດຕັ້ງເຄື່ອນໄຫວວຽກງານໂຄສະນາຜ່ານສື່ເອເລັກໂຕຼນິກ (ເວັບໄຊ) ປະຈຳໄຕມາດ lll . ເຊິ່ງມີທັງຂໍ້ສະດວກ ຂໍ້ຫຍຸ້ງຍາກ ແລະ ວິທີແກ້ໄຂໃນຕໍ່ໜ້າ ພ້ອມທັງວາງທິດທາງແຜນການ ປະຈຳໄຕມາດ lV (10,11,12 )/2024. ເພື່ອເຮັດໃຫ້ວຽກງານໂຄສະນາອົບຮົມຫັນໄປສູ່ຄວາມທັນສະ ໄໝ, ສາມາດຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານການເມືອງ-ແນວຄິດໃນໄລຍະໃໝ່ ໃນຕໍ່ໜ້າ ເພື່ອໃຫ້ການນໍາໃຊ້ເຄື່ອງມືເຕັກໂນໂລຊີກາຍເປັນເສນາທິການໃນການໂຄສະນາເຜີຍແຜ່ບັນດາແນວທາງ, ມະຕິ, ຄຳສັ່ງ ແລະ ອື່ນໆ ຂອງພັກ-ລັດແຕ່ລະຂັ້ນໃນສັງຄົມໄດ້ເຂົ້າ ແລະ ບໍລິໂພກຂ່າວໄດ້ຫລາຍຂື້ນ.
ໃນຕອນທ້າຍກອງປະຊຸມທ່ານປະທານຍັງໄດ້ມີຄໍາເຫັນ ແລະ ເນັ້ນໜັກຫຼາຍບັນຫາ ຕໍ່ຄະນະຊີ້ນຳວຽກງານເວັບໄຊຂອງບັນດາຄະນະໂຄສະນາອົບຮົມແຂວງ ຕ້ອງເປັນເຈົ້າການໃນການຊີ້ນໍາ-ນຳພາ, ຕິດຕາມ, ກວດກາ ແລະ ມີການຊຸກຍູ້ໃຫ້ເອົາໃຈໃສ່ໃນການເກັບກຳຂໍ້ມູນ, ເກັບກຳຂ່າວ, ຂຽນຂ່າວ ປະສານເພື່ອນຮ່ວມງານໃຫ້ຫລາຍຂື້ນກ່ວາເກົ່າ ເພື່ອເຮັດໃຫ້ວຽກງານມີຜົນສຳເລັດ ແລະ ໄດ້ຮັບໝາກຜົນທີ່ດີໃນຕໍ່ໜ້າ.
ຂ່າວ: ຄະນະໂຄສະນາອົບຮົມແຂວງ.