ຕອນເຊົ້າວັນທີ 4 ທັນວາ 2024, ຢູ່ທີ່ຫ້ອງປະຊຸມຄະນະໂຄສະນາອົບຮົມແຂວງອັດຕະປື ໄດ້ຈັດກອງປະຊຸມປະເມີນຜົນການປະຕິບັດວຽກງານຂອງພະນັກງານ – ລັດຖະກອນ ຂັ້ນຫົວໜ້າ, ຮອງຫົວໜ້າຄະນະໂຄສະນາອົບຮົມແຂວງ ປະຈໍາປີ 2024. ໃຫ້ກຽດເຂົ້າຮ່ວມເປັນປະທານ ໂດຍທ່ານ ນ. ບຸນນານ ບຸນນະແສງ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ, ມີບັນດາທ່ານຫົວໜ້າ ແລະ. ຮອງຫົວໜ້າຄະນະໂຄສະນາອົບຮົມແຂວງ, ຄະນະຮັບຜິດຊອບປະເມີນຜົນພະນັກງານ-ລັດຖະກອນຂັ້ນແຂວງ ພ້ອມດ້ວຍຫົວໜ້າຂະແໜງ, ຮອງຫົວໜ້າຂະແໜງ ພາຍໃນເຂົ້າຮ່ວມ.
ໃນກອງປະຊຸມ ທ່ານ ນ. ບຸນນານ ບຸນນະແສງ ຄະນະປະຈຳພັກແຂວງ ໄດ້ກ່າວວ່າ: ການປະເມີນຜົນພະນັກງານ-ລັດຖະກອນ ຂັ້ນຫົວໜ້າ-ຮອງຫົວໜ້າຄະນະ, ເພື່ອປະເມີນການຈັດຕັ້ງປະຕິບັດໜ້າທີ່ວຽກງານໃນການນຳພາ-ຊີ້ນຳ, ວິຊາສະເພາະທີ່ການຈັດຕັ້ງມອບໝາຍໃຫ້ ໄລຍະ 1 ປີ, ທັງເປັນການຍົກໃຫ້ເຫັນຈຸດດີ, ຈຸດອ່ອນ-ຂໍ້ຄົງຄ້າງ ແລະ ວິທີແກ້ໄຂໃນຕໍ່ໜ້າ ແລະ ເພື່ອເປັນການຕໍານິສົ່ງຂ່າວກໍ່ສ້າງຊ່ວຍເຫຼືອເຊິ່ງກັນ ແລະ ກັນ.
ໃນນັ້ນ ທ່ານຍັງໄດ້ເຜີຍແຜ່-ເຊື່ອມຊຶມດໍາລັດ ສະບັບເລກທີ 300/ລບ ວ່າດ້ວຍ ມາດຕາຕ່າງໆຂອງມາດຖານເງື່ອນໄຂການປະເມີນຜົນພະນັກງານ-ລັດຖະກອນ; ພ້ອມນັ້ນ ທ່ານ ຄຳລຽນ ແສງກະເລົາ ຮອງຫົວໜ້າ ພະແນກພາຍໃນແຂວງ ຜ່ານບົດແນະນໍາສະບັບເລກທີ 06/ກຊນ.ກ່ຽວກັບການປະເມີນຜົນງານ ແລະ ເພື່ອເປັນບ່ອນອີງໃນການຈັດຕັ້ງປະຕິບັດການໃຫ້ຄະແນນໄດ້ຖືກຕ້ອງສອດຄ່ອງ ທັງຮັບປະກັນຄວາມເປັນເອກະພາບ ແລະ ຖືກຕ້ອງກັບຄວາມເປັນຈິງ. ຫຼັງຈາກນັ້ນ ຄະນະແຕ່ລະທ່ານກໍ່ໄດ້ຂື້ນຜ່ານບົດເກັບກ່ຽວຜົນງານໃນໄລຍະ 1 ປີ,ຜ່ານຄະແນນປະເມີນຜົນຂອງຕົນເອງ ແລະ ໜູ່ຄະນະກໍໄດ້ປະກອບຄຳຄິດເຫັນ ກໍ່ສ້າຊ່ວຍເຫຼືອເຊິ່ງກັນ ແລະ ກັນ, ເສີມຂະຫຍາຍຈຸດດີ ປັບປຸງຈຸດອ່ອນ ແລະ ເຮັດໃຫ້ກອງປະຊຸມຄັ້ງນີ້ມີບັນຍາກາດຢ່າງຟົດຟື້ນ.
ໃນຕອນທ້າຍ ຍັງໄດ້ຮັບຟັງການໂອ້ລົມຈາກປະທານ ເຊິ່ງທ່ານໄດ້ເນັ້ນໜັກບາງບັນຫາ ເພື່ອເຮັດໃຫ້ຄະນະ,ພະນັກງານ-ລັດຖະກອນ ເອົາໃຈໃສ່, ປັບປຸງ ແລະ ເພີ່ມທະວີການຈັດຕັ້ງປະຕິບັດໜ້າທີ່ວຽກງານຂອງຕົນໃນຕໍ່ໜ້າໃຫ້ສອດຄ່ອງຖຶກຕ້ອງກັບສະພາບຄວາມເປັນຈິງ.
ພາບ-ຂ່າວ:ຄະນະໂຄສະນາອົບຮົມແຂວງ.