ໃນລະຫວ່າງວັນທີ 21-22 ພຶດສະພາ 2024 ຄະນະໂຄສະນາອົບຮົມແຂວງ ສົມທົບກັບຄະນະໂຄສະນາອົບຮົມສູນກາງພັກ ແລະ ເມືອງ ໄດ້ຈັດຊຸດຝຶກອົບຮົມ ຄວາມຮູ້ພື້ນຖານດ້ານການ-ເມືອງການປົກຄອງ, ການສ້າງບ້ານພັດທະນາ ແລະ ອົບຮົມປະຊາຊົນລຽບຕາມຊາຍແດນ ຢູ່ກຸ່ມບ້ານ ສົມບູນ ເມືອງ ພູວົງ ແຂວງ ອັດຕະປື ໃຫ້ກຽດເປັນປະທານຮ່ວມ ທ່ານ ສີທົນ ຊາວພູວົງ,ຮອງເລຂາພັກເມືອງ,ຜູ້ຊີ້ນໍາວຽກແນວຄິດ,ທ່ານ ປອ ຄອນສະຫງ່າ ພິມມະສອນ, ກຳມະການພັກແຂວງ,ຫົວໜ້າຄະນະໂຄສະນາອົບຮົມແຂວງ,ທ່ານ ຄໍາກອງ ທໍາມະເທວາ,ຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ, ມີຄະນະຮັບຜິດຊອບຊຸດຝຶກອົບຮົມ, ເລຂາພັກບ້ານ,ນາຍບ້ານ, ອົງການຈັດຕັ້ງການເມືອງ,ນັກສໍາມະນາກອນມາຈາກຮາກຖານກຸ່ມບ້ານ ເຂົ້າຮ່ວມທັງໝົດຈໍານວນ 33 ຄົນ,ຍິງ 2 ຄົນ.
ຊຸດຝຶກອົບຮົມຄັ້ງນີ້ນໍາໃຊ້ເອກະສານ 7 ບົດດັ່ງນີ້: ຊາດລາວ,ຄົນລາວ,ມູນເຊື້ອ ອັນສະຫງ່າລາສີຂອງປະຊາຊົນລາວ; ລະບົບ ການເມືອງການປົກຄອງຢູ່ ສປປລາວ ຍົກສູງການນໍາພາຂອງໜ່ວຍພັກບ້ານ, ສ້າງໜ່ວຍພັກປອດໃສເຂັ້ມແຂງໜັກແໜ້ນ;ສ້າງບ້ານພັດທະນາ;ການ ແກ້ໄຂຄວາມທຸກຍາກ ດ້ວຍການຜະລິດເປັນສິນຄ້າ;ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ; ອົບຮົມປະຊາຊົນຢູ່ລຽບຕາມຊາຍແດນ ຈຸດປະສົງເພື່ອເຮັດໃຫ້ສະມາຊິກພັກ,ພະນັກງານຫຼັກແຫຼ່ງ ແລະ ປະຊາຊົນ ຢູ່ຮາກຖານບ້ານໃຫ້ມີຄວາມຮັບຮູ້-ເຂົ້າໃຈກ່ຽວກັບຄວາມຮູ້ພື້ນຖານ ດ້ານການເມືອງ-ການປົກຄອງ ແລະ ການສ້າງບ້ານພັດທະນາ, ເຂົ້າໃຈກ່ຽວກັບ ການເສີມຂະຫຍາຍມູນເຊື້ອ, ຍົກສູງຄວາມສາມາດ ນໍາພາຂອງໜ່ວຍພັກບ້ານ, ການສ້າງບ້ານເປັນຫົວໜ່ວຍພັດທະນາ ແລະ ການແກ້ໄຂຄວາມທຸກຍາກ,ເຂົ້າໃຈຕໍ່ແນວທາງຂອງພັກຖຶກຕ້ອງ,ເຮັດໃຫ້ອົງການປົກຄອງບ້ານເຂັ້ມແຂງ, ໜັກແໜ້ນສາມາດນໍາພາແກ້ໄຂວາມທຸກຍາກຂອງປະຊາຊົນໃຫ້ບັນລຸຕາມຄາດໜາຍທີ່ພັກໄດ້ວາງອອກ.ພາຍຫຼັງສໍາເລັດການຝຶກອົບຮົມຄະນະປະທານກໍ່ໄດ້ຜັດປ່ຽນກັນມອບໃບຢັ້ງຢືນໃຫ້ແກ່ນັກສໍາມະນາກອນ ພ້ອມທັງໂອ້ລົມຕໍ່ຊຸດຝຶກອົບຮົມ ໂດຍໄດ້ເນັ້ນໜັກກ່ຽວກັບເນື້ອໃນຈິດໃຈການສ້າງບ້ານພັດທະນາຕາມ 4 ເນື້ອໃນ 4 ຄາດໝາຍ, ໃຫ້ເອົາໃຈໃສ່ຍົກສູງສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງກຸ່ມຄົນບໍ່ຫວັງດີຢູ່ລຽບຕາມຊາຍເເດນ ແລະ ສຶກສາອົບຮົມປະຊາຊົນ ໃຫ້ຮັກສາຄວາມເປັນລະບຽບຮຽບຮ້ອຍ, ມີຄວາມສະຫງົບສຸກ ແລະ ຖືວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ໃຫ້ເປັນໜ້າທີ່ຂອງໝົດທຸກຄົນພາຍໃນບ້ານ.
+ພາບ: ຂ່າວ: ຄະນະໂຄສະນາອົບຮົມແຂວງ.
