ກອງປະຊຸມໃຫຍ່ຜູ້ແທນ ອົງຄະນະພັກເມືອງພູວົງ ຄັ້ງທີ VI ໄດ້ດຳເນີນໄປເປັນເວລາ 1 ວັນເຄິງ ໄດ້ສຳເລັດລົງຢ່າງສົມບູນ ໃນວັນ 21 ກຸມພາ 2025 ໂດຍມີ ສະ ຫາຍ ພົທ ວັນທອງ ກອງມະນີ ກຳມະການສູນກາງພັກ, ເລຂາຄະນະບໍລິຫານງານພັກແຂວງ-ເຈົ້າແຂວງອັດຕະປື ເປັນຜູ້ຊີ້ນຳ, ກອງປະຊຸມໃຫຍ່ຄັ້ງນີ້ ດຳເນີນພາຍ ໃຕ້ການເປັນປະທານ ຂອງສະຫາຍ ສຸລິຈັນ ໂຊກຄຳຈັນ ກຳມະການພັກແຂວງ ເລຂາຄະນະບໍລິຫານງານພັກເມືອງ-ເຈົ້າເມືອງພູວົງ, ມີບັນດາສະຫາຍຄະນະນຳທີ່ຕາງໜ້າຈາກອົງການຈັດຕັ້ງຂັ້ນແຂວງ, ບັນດາຄະນະບໍລິຫານງານພັກເມືອງ, ແຂກຖືກເຊີນ ແລະ ຜູ້ແທນສົມບູນ 124 ສະຫາຍ, ຍິງ 19 ສະຫາຍເຊິ່ງເປັນຕົວແທນ ໃຫ້ແກ່ສະມາຊິກພັກໃນທົ່ວເມືອງ ຈຳນວນ 1,049 ສະຫາຍ, ຍິງ 296 ສະຫາຍ.
ສະຫາຍ ນາງ ບຸນນານ ບຸນນະແສງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງໄດ້ຜ່ານມະຕິຕໍ່ກອງປະຊຸມໃຫຍ່ໃຫ້ຮູ້ວ່າ: ກອງປະຊຸມໃຫຍ່ຜູ້ແທນ ອົງຄະ ນະພັກເມືອງຄັ້ງນີ້, ດຳເນີນພາຍໃຕ້ຄຳຂວັນ: ຍົກສູງຄວາມສາມາດການນຳພາ ຂອງອົງຄະນະພັກເມືອງ, ຮັບປະ ກັນໃຫ້ເມືອງພູວົງ ມີຄວາມສະຫງົບຢ່າງໜັກແໜ້ນ, ຄຸ້ມຄອງ ແລະ ນຳໃຊ້ຊັບພະຍາກອນທໍາມະຊາດ ໃຫ້ມີຄວາມຍືນຍົງ, ສ້າງການຫັນປ່ຽນຢ່າງແຂງແຮງ ທາງດ້ານແນວຄິດ, ນຳພາການພັດທະນາກະສີກຳ ຕາມທິດສ້າງເສດຖະກິດ ເອກະລາດເປັນເຈົ້າຕົນເອງ ໃຫ້ປາກົດຜົນເປັນຈິງ ເທື່ອລະກ້າວ, ກອງປະຊຸມໃຫຍ່ ໄດ້ດໍາເນີນໄປດ້ວຍບັນຍາກາດຟົດຟື້ນ, ມີເນື້ອໃນສົມບູນຄົບ ຖ້ວນ ແລະ ປະສົບຜົນສຳເລັດຕາມຈຸດປະສົງ ລະດັບຄາດໝາຍທີ່ວາງໄວ້.ໃນກອງປະຊຸມໃຫຍ່ຜູ້ແທນ ອົງຄະນະພັກເມືອງ ຄັ້ງທີ VI ໄດ້ລົງມະຕິເປັນເອກະພາບ ແລະ ຮັບຮອງເອົາບັນດາເນື້ອໃນສຳຄັນທີ່ຖືກຕ້ອງສອດຄ່ອງ ກັບສະພາບຄວາມເປັນຈິງທີ່ຄະນະບໍລິຫານພັກເມືອງຊຸດໃໝ່ ຈະໄດ້ສືບຕໍ່ແກ້ໄຂໃນ 5 ປີຕໍ່ໜ້າ (2025-2029) ໃຫ້ເຂັ້ມແຂງກ້າວຂຶ້ນຢ່າງບໍ່ຢຸດຢັ້ງ.
ກອງປະຊຸມໃຫຍ່ບັນດາຜູ້ແທນ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ ສະໄໝທີ VI ເຊິ່ງມີຜູ້ສະໝັກອອກເລືອກຕັ້ງ 29 ສະຫາຍ, ຍິງ 04 ສະຫາຍ ແລະ ເລືອກໄດ້ 25 ສະຫາຍ, ຍິງ 04, ກອງປະຊຸມປະຖົມມະລຶກ ເລືອກໄດ້ຄະນະປະຈຳ 7 ສະຫາຍ, ຍິງ 1 ສະ ຫາຍ, ໃນນີ້ ໄດ້ເອກະພາບເລືອກຕັ້ງເອົາ ສະຫາຍ ດາບແກ້ວ ໄຊຍະແສງ ເປັນເລຂາ, ສະຫາຍ ຄຳໃບ ແກ້ວມະນີ ເປັນຮອງເລຂາ, ສະຫາຍ ພັທ ຄຳກ້ອນ ດວງສົມປານ ເປັນຮອງເລຂາ, ສະຫາຍ ວັນປະເສີດ ສີຊານົນ ເປັນປະທານ ຄະນະກວດກາພັກ, ອົງການກວດກາລັດເມືອງ, ສະຫາຍ ສຸກດາວເຮືອງ ຜິວຄໍາພັນ ເປັນຮອງປະທານ ຄະນະກວດກາພັກ, ອົງການກວດກາລັດເມືອງ, ສະຫາຍ ຄຳຢາ ໄຊຍະດອນ ເປັນຮອງປະທານ ຄະນະກວດກາພັກ, ອົງການກວດກາລັດເມືອງ ພ້ອມນີ້ກອງປະຊຸມໃຫຍ່ໄດ້ເລືອກຕັ້ງເອົາຜູ້ແທນສົມບູນ ແລະ ຜູ້ແທນສໍາຮອງໄປຮ່ວມກອງປະຊຸມໃຫຍ່ຜູ້ແທນ ອົງຄະນະພັກແຂວງ ຄັ້ງທີ XII ສາມາດເລືອກໄດ້ສົມບູນ, ສຳຮອງ 15 ສະຫາຍ, ຍິງ 02 ສະຫາຍ.
ກອງປະຊຸມໃຫຍ່ ຍັງໄດ້ຮັບຟັງການໂອ້ລົມຈາກ ສະຫາຍ ພົທ ວັນທອງ ກອງມະນີ ກຳມະການສູນກາງພັກ, ເລຂາຄະນະບໍລິຫານງານພັກແຂວງ-ເຈົ້າແຂວງອັດຕະປື ເຊິ່ງສະຫາຍຍັງໄດ້ຝາກຄວາມເຊື່ອໝັ້ນຢ່າງສູງ ຕໍ່ຄະນະບໍລິຫານງານພັກເມືອງຊຸດໃໝ່ ທີ່ຈະສືບຕໍ່ນຳພາ-ຊີ້ນຳວຽກງານຮອບດ້ານຂອງເມືອງ ໂດຍສະເພາະສະຫາຍເລຂາພັກເມືອງ ທີ່ຈະເປັນຄັນທຸງນຳໜ້າໃນການນໍາພາຈັດຕັ້ງປະຕິບັດ ມະຕິກອງປະຊຸມໃຫຍ່ ຜູ້ແທນອົງຄະນະພັກເມືອງພູວົງ ຄັ້ງທີ VI ຫັນໃຫ້ເປັນແຜນການ, ແຜນງານ, ໂຄງການລະອຽດຢູ່ໃນທຸກຂະແໜງການ ແລະ ຮາກຖານບ້ານ ແນໃສ່ສ້າງເມືອງພູວົງ ໃຫ້ມີໃບໜ້າໃໝ່ ແລະ ພັດທະນາກ້າວຂຶ້ນຕາມລະດັບຄາດໝາຍທີ່ວາງໄວ້.
ໂດຍ: ສາຍນ້ຳເຊກອງ