ໃນວັນທີ 22 ກໍລະກົດ 2024 ຢູ່ທີ່ຫ້ອງປະຊຸມຊັ້ນ 5 ຂອງຫ້ອງວ່າການແຂວງ ໄດ້ຈັດກອງປະຊຸມການຮັບຟັງເຜີຍແຜ່ທິດຊີ້ນໍາຂອງທ່ານ ປອ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ເພື່ອຊີ້ນຳກ່ຽວກັບການກະກຽມກອງປະຊຸມໃຫຍ່ຄັ້ງທີ XII ຂອງພັກ, ການກະກຽມສະເຫຼີມສະຫຼອງ 3 ວັນປະຫວັດສາດ ແລະ ຕິດພັນກັບການກະກຽມກອງປະຊຸມໃຫ່ຍ 3 ຂັ້ນຂອງແຂວງ ມີທ່ານ ພົນໂທ ວັນທອງ ກອງມະນີ ກຳມະການສູນກາງພັກ ເລຂາພັກແຂວງເຈົ້າແຂວງ ອັດຕະປື, ບັນດາອົງຄະນະພັກແຂວງ ແລະ ບັນດາຂະແໜງການທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງທ່ານທີ່ມາເຄື່ອນໄຫວເຮັດວຽກໃນຄັ້ງນີ້ ແມ່ນເພື່ອເຜີຍແຜ່ບັນດານິຕິກຳຕ່າງໆກ່ຽວກັບການກະກຽມສະເຫຼີມສະຫຼອງ3ວັນປະຫັວດສາດໃນປີ 2025 ຄື: ວັນສ້າງຕັ້ງພັກ ຄົບຮອບ 70 ປີ, ວັນສະຖາປານາ ສປປ ລາວ ຄົບຮອບ 50 ປີ, ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 105 ປີ, ແລະ ເຜີຍແຜ່ແນະນໍາກ່ຽວກັບການຊຸກຍູ້ບົດປະກອບຄໍາເຫັນຂອງບັນດາຕົວແທນຈາກແຂວງຕ່າງໆຕໍ່ກອງປະຊຸມໃຫ່ຍຄັ້ງທີ XII ຂອງພັກ. ໃຫ້ບັນດາທ່ານການນໍາຂອງແຂວງກຳໄດ້ເພື່ອນໍາໄປຈັດຕັ່ງປະຕິບັດເຜີຍແຜ່ແນະນໍາກ່ຽວກັບການກະກຽມຊຸກຍູ້, ແນະນໍາບົດປະກອບຄໍາເຫັນຂອງບັນດາຕົວແທນຈາກແຂວງ ຕໍ່ກອງປະຊຸມໃຫຍ່ຄັ້ງທີ XII ຂອງພັກ ໂດຍສະເພາະ ແມ່ນການກະກຽມກອງປະຊຸມໃຫຍ່ 3 ຂັ້ນ ຂອງແຂວງອັດຕະປື.
ໃນກອງປະຊຸມຍັງໄດ້ຮັບຟັງການລາຍງານໂດຍທ່ານ ນ.ມີນາພອນ ໄຊສົມພູ ຮອງເລຂາພັກແຂວງ, ປະທານສະພາປະຊາຊົນແຂວງ ກໍ່ໃຫ້ກຽດລາຍງານໂດຍຫຍໍ້ວຽກງານທີ່ພົ້ນເດັ່ນໄລຍະຜ່ານມາຂອງແຂວງ ອັດຕະປືໂດຍສະເພາະ ການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິຄໍາສັ່ງສະໄໝທີ XI ຂອງພັກ, ມະຕິກອງປະຊຸມໃຫ່ຍຄັ້ງທີ XI ຂອງອົງຄະນະພັກແຂວງ, ແຜນພັດທະນາເສດຖະກິດສັງຄົມ 5 ປີ ຄັ້ງທີ IX ຕິດພັນກັບການຜັນຂະຫຍາຍມະຕິກອງປະຊຸມໃຫ່ຍຂອງອົງຄະນະພັກແຂວງ ຕິດພັນກັບສອງວາລະແຫ່ງຊາດ, ການກະກຽມກອງປະຊຸມໃຫຍ່ 3 ຂັ້ນ ແລະ ການສ້າງຜົນງານຂໍ່ານັບຮັບຕ້ອນບັນດາບຸນໃຫ່ຍທີ່ສໍ່າຄັນຂອງພັກ ແລະ ຂອງຊາດ ໃນປີ 2025 ພ້ອມທັງກະກຽມກອງປະຊຸມໃຫຍ່ຄັ້ງທີ XII ຂອງພັກ, ການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ XI ຂອງພັກຜ່ານມາເປັນຕົ້ນ: ຕົວແບບທາງດ້ານການຜະລິດທຸລະກິດ, ການຄຸ້ມຄອງບໍລິຫານລັດ ແລະ ຕົວແບບການກໍ່ສ້າງຮາກຖານການເມືອງ, ການບໍລິຫານການຈັດຕັ້ງມີການວາງແຜນຢ່າງເປັນລະບົບບົນພື້ນຖານປະຕິບັດລະບົບກົນໄກບໍລິການຢ່າງມີຄວາມວ່ອງໄວ, ຮັດກຸມ, ມີຂັ້ນຕອນກະທັດຮັດ, ບໍ່ແກ່ຍາວຫລາຍຂັ້ນຫລາຍຂອດ ເພື່ອກ້າວໄປສູ່ການບໍລິການຜ່ານປະຕູດຽວເທື່ອລະກ້າວ.
ໃນຕອນທ້າຍທ່ານ ປອ ຄຳພັນ ເຜີຍຍະວົງ ໄດ້ເນັ້ນໜັກກ່ຽວກັບການກະກຽມກອງປະຊຸມໃຫ່ຍ 3 ຂັ້ນ ແລະ ການກະກຽນສະເຫຼີມສະຫຼອງ 3 ວັນປະຫວັດສາດນີ້ ຄວນສຸມໃສ່ ປຶກສາຫາລື, ແບ່ງຄວາມຮັບຜິດຊອບກັນຢ່າງລະອຽດ, ບັນດາໜ້າວຽກໃດຕິດພັນກັບພາກສ່ວນໃດ ແມ່ນມອບໃຫ້ພາກສ່ວນນັ້ນຮັບຜິດຊອບຢ່າງລະອຽດ, ແຕ່ງຕັ້ງຄະນະຮັບຜິດຊອບຂັ້ນແຂວງຂຶ້ນ ເພື່ອຮັບຜິດ ຊອບ ວຽກນີ້ໂດຍກົງ ແລະ ພ້ອມກັນຈັດຕັ້ງປະຕິບັດໃຫ້ມີຜົນສໍາເລັດ ແລະ ທັນກັບກໍານົດເວລາ, ການຈັດຕັ້ງປະຕິບັດການກະກຽມສະເຫຼີມສະຫຼອງຕ້ອງຕິດພັນກັບການກະກຽມກອງປະຊຸມ 3 ຂັ້ນໃຫ້ມີຂະບວນການຟົດຟື້ນ, ມີບັນຍາກາດ, ການສະເຫຼີມສະຫຼອງຕ້ອງບົນຈິດໃຈປະຢັດມັດທະຍັດ.
ສໍາລັບການເລືອກເປົ້າໝາຍ ເພື່ອປະກອບຄຳເຫັນຕໍ່ກອງປະຊຸມໃຫຍ່ຄັ້ງທີ XII ຂອງພັກ. ຄວນເລືອກເອົາບັນດາຕົວແບບດີເດັ່ນໃນຂົງເຂດການເມືອງ, ຂົງເຂດວັດທະນະທຳ- ສັງຄົມ, ຂົງເຂດ ປກສ-ປກຊ ແລະ ຂົງເຂດເສດຖະກິດ, ການເຮັດການຜະລິດທຸລະກິດທີ່ດີເດັ່ນ, ດ້ວຍການນຳໃຊ້ພູມປັນຍາ ເຂົ້າໃນການພັດທະນາ, ສາມາດເປັນບົດຮຽນໃຫ້ຊຸມຊົນໄດ້ ແລະ ສາມາດເປັນບົດຮຽນເພື່ອຫັນໄປຈັດຕັ້ງປະຕິບັດວຽກງານຮອບດ້ານໃນແຂວງໃຫ້ປາກົດຜົນເປັນຈິງ.
ຂ່າວ:-ພາບ: ຄະນະໂຄສະນາອົບຮົມແຂວງ