ແຂວງ ອັດຕະປື ຈັດຂະບວນຄາລະວານສູ່ຖານທີ່ໜັ້ນປະຕິວັດເຂດໃຕ້

ເພື່ອເປັນການສະເຫຼີມສະຫລອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ແລະ ວັນຄຽດແຄ້ນຂອງປະຊາຊົນລາວ, ເສຍອົງຄະເສຍສະຫຼະຊີວິດເພື່ອປະເທດຊາດຄົບຮອບ79 ປີ ແລະ ເພື່ອເປັນການຫວນຄືນມູນເຊື້ອປະຫວັດຄວາມເປັນມາການສ້າງຕັ້ງຖານທີ່ໝັ້ນການປະຕິວັດເຂດໃຕ້, ມາຮອດວັນທີ 20 ມີນາ 2025 ແຂວງອັດຕະປືໄດ້ຈັດຂະບວນຄາລະວານ ໄປສູ່ຖານທີ່ໝັ້ນການປະຕິວັດເຂດໃຕ້, ໂດຍໃຫ້ກຽດເຂົ້າຮ່ວມຂອງສະຫາຍ ພົທ ວັນທອງ ກອງມະນີ ເລຂາພັກແຂວງ, ເຈົ້າແຂວງ ອັດຕະປື ມີຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າພະແນກການ ອ້ອມຂ້າງແຂວງ, ເມືອງ, ພ້ອມດ້ວຍສະມາຊິກພັກ, ພະນັກງານ,ທະຫານ, ຕໍາຫຼວດດ ນັກຮຽນ, ນັກສຶກສາ ຕະຫຼອດຮອດພໍ່ແມ່ປະຊາຊົນເຂົ້າຮ່ວມຢ່າງເປັນຂະບວນຟົດພື້ນ.

ໃນພິທີ ສະຫາຍ ວັນທອງ ວຽງພະຈັນ ພະນັກງານບໍານານ, ອາດີດການນໍາຂອງແຂວງ ໄດ້ຂຶ້ນປາຖະກະຖາ ວັນສ້າງຕັ້ງພັກປະຊາຊົນປະຕິວັດລາວຄົບຮອບ 70 ປີ (22 ມີນາ 1955-22 ມີນາ 2025) ແລະ ເລົ່າມູນເຊື້ອປະຫວັດຄວາມເປັນມາການສ້າງຕັ້ງຖານທີ່ໝັ້ນການປະຕິວັດເຂດໃຕ້, ສະຫາຍ ພັອ ຈັນທະໜາ ກົມມະເມືອງ ຮອງປະທານ ສະຫະພັນນັກຮົບເກົ່າແຂວງ ໄດ້ຂື້ນປາຖະກະຖາ ວັນຄຽດແຄ້ນຂອງປະຊາຊົນລາວ,ວັນເສຍອົງຄະ,ວັນເສຍສະຫຼະຊີວິດເພື່ອປະເທດຊາດ ຄົບ ຮອບ 79 ປີ(21 ມີນາ 1946-21 ມີນາ 2025) ໃຫ້ຮູ້ວ່າ: ໃນປີ1930 ປະທານໂຮ່ຈີມິນໄດ້ນໍາພາສ້າງຕັ້ງພັກຄອມມຸນິດອິນດູຈີນ(ປະກອບມີ: ລາວ,ຫວຽດນາມ, ກຳປູເຈຍ), ໃນປີ1934 ອົົງຄະນະພັກແຄ້ວລາວໄດ້ຮັບການສ້າງຕັ້ງຂຶ້ນເພື່ອນໍາພາຕໍ່ສູ້ຕ້ານຈັກກະພັດຝຣັ່ງຈົນມາຮອດວັນທີ 12 ຕຸລາ 1945 ສາມາດຍຶດອໍານາດທົ່ວປະເທດແລະປະກາດຕໍ່ໂລກວ່າ ລາວມີອໍານາດອະທິປະໄຕແລະຜືນແຜ່ນດິນເປັນຂອງຕົນເອງ,ປີ 1946 ຝຣັ່ງກໍໄດ້ກັບຄືນມາຮຸກຮານລາວເປັນຄັ້ງທີ 2ອີກ, ປີ1955 ພາຍຫຼັງຈັກກະພັດຝຣັ່ງປາລາໄຊຖອນຈາກລາວ, ຈັກກະພັດອາເມລິກາໄດ້ໂດດເຂົ້າມາແທນທີ່ດ້ວຍລະບອບລ່າເມືອງຂຶ້ນແບບໃໝ່ທີ່ຮ້າຍແຮງທະວີຄູນ ພັກປະຊາຊົນປະຕີວັດລາວໄດ້ສ້າງຕັ້ງຂຶ້ນໂດຍໄດ້ແຍກອອກຈາກພັກຄອມມູນິດອິນດູຈີນໃນວັນທີ 22 ມີນາ 1955 ນັບແຕ່ໄດ້ຮັບການສ້າງຕັ້ງ.ພັກໄດ້ແບກຫາບພາລະກໍາອັນໜັກໜ່ວງເພື່ອນໍາພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດຢ່າງດຸເດືອດຂ້ຽວຂາດກ້າວໄປເຖິງການປົດປ່ອຍປະເທດຊາດຢ່າງສົມບູນ, ຕະຫຼອດໄລຍະແຫ່ງການຊີ້ນໍາພາພັກເຮົາໄດ້ຮັບຄວາມເຊື່ອໝັ້ນຈາກປະຊາຊົນລາວ ແລະ ໄດ້ມີຫຼາຍຜົນສໍາເລັດທີ່ຈາລຶກໄວ້ໃນປະຫວັດສາດແຕ່ລະໄລຍະຄື: ປີ 1955-1962 ປະຕິບັດສັນຍາເຊີແນວ 1954 ປົກປັກຮັກສາ 2 ແຂວງເຕົ້າໂຮມຫົວພັນ,ຜົ້ງສາລີ ທັງນໍາພາການຕໍ່ສູ້ການເມືອງຢູ່ 10 ແຂວງ, ປີ1957 ໄດ້ສ້າງຕັ້ງລັດຖະບານປະສົມແຫ່ງຊາດຄັ້ງທີ 1, ປີ 1959-1962 ໄດ້ນໍາພາກອງພັນທີ 2 ຂອງຝ່າຍປະເທດລາວຜ່າວົງປິດລ້ອມຂອງສັດຕູຢ່າງປອດໄພ ແລະ ນໍາເອົາຜູ້ນໍາແຫກຄຸກຢ່າງມະຫັດສະຈັນ ສາມາດປົດປ່ອຍດິນແດນໄດ້2/3ຂອງປະເທດ, ປີ1972 ກອງປະຊຸມໃຫຍ່ຄັ້ງທີ 2ໄດ້ເປີດຂຶ້ນໄດ້ວາງແນວທາງຕໍ່ສູ້ເພື່ອສໍາເລັດໄລຍະການປະຕິວັດຊາດປະຊາທິປະໄຕໃນທົ່ວປະເທດ, ປີ 1973-1975ເປັນໄລຍະສຸດທ້າຍສາມາດຍາດເອົາໄຊຊະນະສໍາເລັດພາລະກິດການປະຕິວັດຊາດປະຊາທິປະໄຕຢ່າງສົມບູນ ໂດຍກໍາແໜ້ນກາລະໂອກາດປະຫວັດສາດພັນປີເທື່ອ 1 ຈາກການນໍາໃຊ້ສະ ໜາມທັງສາມກ້ານດ້ວຍສາມບາດຄ້ອນຍຸດທະສາດ, ການລຸກຮື້ຂຶ້ນຂອງປະຊາຊົນ, ການໝູນໜີບຂອງກຳລັງປະກອບອາວຸດ ແລະ ການລຸກຂຶ້ນແຍກຕົວຂອງທະຫານສັດຕູເອງ, ວັນທີ 2 ທັນວາ 1975 ໄດ້ປະກາດສ້າງຕັ້ງ ສປປ ລາວ ຢ່າງເປັນທາງການທີ່ກ້າວເຂົ້າສູ່ໄລຍະໃໝ່ຂອງການປະຕິວັດ, ກາຍເປັນພັກກຳອໍານາດມີຄວາມຮັບຜິດຊອບຕໍ່ໂຊກສະຕາກຳຂອງປະເທດຊາດ.

ຕະຫຼອດໄລຍະສ້າງຕັ້ງ, ຕໍ່ສູ້, ເຕີບໃຫຍ່ຂະຫຍາຍຕົວ ແລະ ນໍາພາການປະຕິວັດ 70 ປີ ຜ່ານມາ ພັກເຮົາ ຍາມໃດກໍຮັກສາໄດ້ຄຸນທາດການເມືອງ, ທາດແທ້ປະຕິວັດວິທະຍາສາດ; ຢຶດໝັ້ນລັດທິ ມາກ-ເລນິນ, ແນວຄິດ ໄກສອນ ພົມວິຫານ, ມູນເຊື້ອອັນດີງາມຂອງພັກຂອງຊາດ ແລະ ຈຸດພິເສດຂອງ ສປປ ລາວ; ພັກໄດ້ຢຶດໝັ້ນ ຢ່າງສະເໝີຕົ້ນສະເໜີຕໍ່ອຸດົມການສັງຄົມນິຍົມ ດ້ວຍການສ້າງ ແລະ ບູລະນະລະບອບ ປະຊາທິປະໄຕ ປະຊາຊົນ ຕາມເສັ້ນທາງກ້າວຂຶ້ນສັງຄົມນິຍົມຢ່າງໜັກແໜ້ນ. ໃນເງື່ອນໄຂໃໝ່ ພັກເຮົາໄດ້ ສືບຕໍ່ນໍາພາປະເທດຊາດຜ່ານຜ່າ ຄວາມຫຍຸ້ງຍາກ, ສິ່ງທ້າທາຍທົດສອບຕ່າງໆ ສາມາດຍາດໄດ້ຜົນງານໃຫຍ່ ຫຼວງ, ມີຄວາມໝາຍປະຫວັດສາດ, ປະຕິບັດສອງໜ້າທີ່ຍຸດທະສາດປົກປັກຮັກສາ ແລະ ສ້າງສາປະເທດຊາດ ມີຜົນສໍາເລັດເປັນກ້າວໆ,

ເຮັດໃຫ້ປະເທດເຮົາ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມ ມີຄວາມເປັນລະບຽບຮຽບຮ້ອຍໂດຍພື້ນຖານ; ເສດຖະກິດ ຂະຫຍາຍຕົວຢ່າງຕໍ່ເນື່ອງ ແລະ ຍູ້ແຮງການຫັນເປັນອຸດສາຫະກຳ ແລະ ທັນສະໄໝ; ເພີ່ມທະວີຄວາມສາມາດປ້ອງກັນຊາດ-ປ້ອງກັນຄວາມ ສະຫງົບ; ເປີດກວ້າງການພົວ ພັນຮ່ວມມືກັບຕ່າງປະເທດ, ຍົກສູງບົດບາດຂອງປະເທດໃນເວທີສາກົນນັບມື້ສູງ ຂຶ້ນ; ປັບປຸງຄວາມເຊື່ອໝັ້ນຂອງປະຊາຊົນບັນດາເຜົ່າຕໍ່ກັບການຊີ້ນໍາ-ນໍາພາຂອງພັກ, ພັກເຮົາສົມແລ້ວທີ່ເປັນ ກໍາລັງຫຼັກແຫຼ່ງນໍາພາໃນທົ່ວລະບົບ ການເມືອງ ປະຊາທິປະໄຕ ປະຊາຊົນ, ຜົນງານ ແລະ ໄຊຊະນະທີ່ຍາດມາ ໄດ້ນັ້ນ ນອກຈາກການຊີ້ນໍາ-ນໍາພາ ອັນໜັກແໜ້ນຂອງພັກແລ້ວ ແມ່ນມາຈາກຄວາມພະຍາຍາມສູ້ຊົນ, ບາກ ບັ່ນຂອງທົ່ວກອງທັບ, ທົ່ວປວງຊົນລາວ ທັງຊາດ, ໃນນັ້ນ ມີການປະກອບສ່ວນດ້ວຍການເສຍສະຫຼະຊີວິດ ເລືອດເນື້ອເຫື່ອແຮງ, ສະຕິປັນຍາອັນສໍາຄັນ ຂອງຖັນແຖວພະນັກງານ-ສະມາຊິກພັກ, ນັກຮົບ ແລະ ຕະຫຼອດ ຮອດປະຊາຊົນບັນດາເຜົ່າຊັ້ນຄົນຕ່າງໆ, ພວກເຮົາມີຄວາມເອກອ້າງທະນົງໃຈຕໍ່ທາດແທ້ອັນດີງາມ, ມູນເຊື້ອວິລະຊົນ ແລະ ປະຫວັດສາດອັນສະຫວ່າງສະໄຫວຂອງພັກຢ່າງສະຫງ່າງາມ.

ພາບ:ຂ່າວ: ວົງສະໄໝ