ກອງປະຊຸມຄັ້ງປະຖົມມະລືກ ຂອງສະພາປະຊາຊົນແຂວງ ຊຸດທີ V ໄດ້ອັດລົງດ້ວຍຜົນສຳເລັດ ພາຍຫຼັງໄດ້ດຳເນີນມາເປັນເວລາ 2 ວັນແຕ່ວັນທີ 23-24 ເມສາ 2026 ທີ່ຫ້ອງປະຊຸມຂອງສະພາປະຊາຊົນແຂວງ, ໂດຍການເປັນປະທານຂອງ ທ່ານ ບຸນເຖິງ ດາວສະຫວັນ ປະທານສະພາປະຊາຊົນແຂວງ, ມີການນໍາພັກ- ລັດຂອງແຂວງ, ພ້ອມດ້ວບັນດາທ່ານສະມາຊິກສະພາແຫ່ງຊາດ ເຂດເລືອກຕັ້ງທີ 17 ແລະ ບັນດາທ່ານ ສະມາຊິກສະພາປະຊາຊົນແຂວງ ແລະ ແຂກຖືກເຊີນເຂົ້າຮ່ວມ.
ທ່ານ ບຸນເຖິງ ດວງສະຫັວນ ປະທານສະພາປະຊາຊົນແຂວງ ໄດ້ກ່າວສູນທອນພົດປິດກອງປະຊຸມວ່າ: ກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງອັດຕະປື ຊຸດທີ V ໄດ້ຮັບຟັງການລາຍງານຂອງຄະນະກຳມະການເລືອກຕັ້ງຂັ້ນແຂວງ ກ່ຽວກັບຜົນຂອງການເລືອກຕັ້ງ ແລະ ຢັ້ງຢືນຄຸນລັກສະນະຂອງສະມາຊິກສະພາປະຊາຊົນຂັ້ນແຂວງ ຊຸດທີ V, ຊຶ່ງໄດ້ຍົກໃຫ້ເຫັນ ເຖິງຜົນສໍາເລັດໃນການຈັດຕັ້ງຜັນຂະຫຍາຍ, ມະຕິກົມການເມືອງສູນການພັກ ແລະ ຄໍາແນະນໍາວ່າດ້ວຍການ ເພີ່ມທະວີການນໍາພາ-ຊີ້ນໍາ ຂອງອົງຄະນະພັກທຸກຂັ້ນ ຕໍ່ການເລືອກຕັ້ງສະມາຊິກສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ໄດ້ດໍາເນີນໄປຢ່າງມີຜົນສໍາເລັດຕາມແຜນການທີ່ວາງໄວ້, ເປັນການສ້າງເງື່ອນໄຂໃຫ້ແກ່ຜູ້ມີສິດປ່ອນບັດເລືອກຕັ້ງ ໃນທົ່ວແຂວງ ໄດ້ນຳໃຊ້ສິດປະຊາທິປະໄຕ ຕາມທີໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ເພື່ອເລືອກຕັ້ງເອົາຕົວແທນຂອງຕົນເພື່ອປະຕິບັດສິດອຳນາດ ຂອງປະຊາຊົນ ຢູ່ສະພາປະຊາຊົນຂັ້ນແຂວງ ໃນການພິຈາລະນາຮັບຮອງບັນຫາສໍາຄັນພື້ນຂອງທ້ອງຖິ່ນຂອງ ແຂວງອັດຕະປື.
ກອງປະຊຸມໄດ້ດໍາເນີນການເລືອກຕັ້ງ ເອົາດໍາແໜ່ງສໍາຄັນ ຂອງສະພາປະຊາຊົນແຂວງອັດຕະປື ຊຸດທີ V ເຊັ່ນ: ປະທານ-ຮອງປະທານ ສະພາປະຊາຊົນແຂວງ, ກຳ ມະການຄະນະປະຈໍາສະພາປະຊາຊົນແຂວງ. ພ້ອມດຽວກັນນັ້ນ, ກໍ່ໄດ້ຮັບຮອງເອົາກົງຈັກການຈັດຕັ້ງຂອງສະພາປະຊາຊົນແຂວງ ຊຸດທີ V, ປະທານຄະນະກຳມະການ ແລະ ຫົວໜ້າຫ້ອງວ່າການ ສະພາປະຊາຊົນຂັ້ນແຂວງ. ນອກນັ້ນ, ກອງປະຊຸມຍັງໄດ້ຮັບຮອງເອົາການແຕ່ງຕັ້ງປະທານອົງການກວດກາລັດຂັ້ນແຂວງ ແລະ ຫົວ ໜ້າອົງການຕ້ານການສໍ້ລາດບັງຫຼວງຂັ້ນແຂວງ ດ້ວຍຄະແນນສຽງເຫັນດີເປັນສ່ວນຫຼາຍ. ກອງປະຊຸມໄດ້ຮັບຟັງການກ່າວລາໜ້າທີ່ ແລະ ກ່າວຮັບໜ້າທີ່ ຂອງທ່ານປະທານສະພາປະຊາຊົນແຂວງ, ການຮັບໜ້າທີ່ຂອງປະທານອົງການກວດກາລັດຂັ້ນແຂວງ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນແຂວງ, ເຊີ່ງມັນສະແດງເຖິງຄວາມມຸ້ງໝັ້ນ, ການຕັດສິນໃຈສູງໃນການເພີ່ມທະວີຄວາມຮັບຜິດຊອບ ຕໍ່ການປະຕິບັດໜ້າທີ່ຂອງຕົນຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ, ກໍ່ຄືພັກ-ລັດມອບໝາຍໃຫ້ ໃນຖານະທີ່ເປັນອົງການຕົວແທນແຫ່ງສິດ ແລະ ຜົນປະໂຫຍດລວມ ຂອງປະຊາຊົນລາວບັນດາເຜົ່າໃນທົ່ວແຂວງ, ພ້ອມຈະເຮັດໜ້າທີ່ອັນສຸດທີ່ມີກຽດ ແລະ ມີຄວາມໝາຍສໍາຄັນ ຕາມການມອບໝາຍຂອງພັກ-ລັດ ແລະ ປະຊາຊົນລາວບັນດາເຜົ່າໃນທົ່ວແຂວງມອບໝາຍໃຫ້. ເພື່ອພ້ອມກັນສຸມໃສ່ແກ້ໄຂ, ພິຈາ ລະນາ ແລະ ຮັບຮອງເອົາດ້ານຫຼັກການ ກ່ຽວກັບບົດລາຍງານແຜນພັດທະນາເສດຖະກິດ-ສັງ ຄົມ 5 ປີ ຄັ້ງທີ X (2026-2030).
ກອງປະຊຸມໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຄະນະກຳມະການປົກຄອງແຂວງ, ກໍ່ຄືການນໍາຂັ້ນແຂວງ ທີ່ໄດ້ພ້ອມພາກັນຜ່ານຜ່າ ແລະ ເອົາໃຈໃສ່ນໍາພາ-ຊື້ນໍາ ທຸກຂະແໜງການ ໃນການຈັດຕັ້ງປະຕິບັດບັນດາຄາດໝາຍ ທີ່ໄດ້ກຳນົດໃນແຜນ 5 ປີຜ່ານມາ ຢ່າງມີຜົນສໍາເລັດຫຼາຍດ້ານ, ອັນໄດ້ປະກອບສ່ວນເຮັດໃຫ້ເສດຖະກິດທົ່ວແຂວງ ມີສະຖຽນລະພາບດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ, ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ.
ກອງປະຊຸມໄດ້ສະເໜີໃຫ້ຄະນະກຳມະການປົກຄອງແຂວງ ສືບຕໍ່ການເພີ່ມທະວີການນໍາພາ-ຊີ້ນໍາ ການຈັດຕັ້ງປະຕິບັດບັນດາຄາດໝາຍສູ້ຊົນ, ແຜນວຽກຈຸກສຸມ ແລະ ມາດຕະການຈັດຕັ້ງປະຕິບັດໃນຕໍ່ໜ້າ ໃຫ້ມີຜົນສໍາເລັດຕາມແຜນການກໍານົດໄວ້ເປັນກ້າວໆ. ກອງປະຊຸມໄດ້ພິຈາລະນາ ແລະ ຮັບຮອງແຜນການເຄື່ອນໄຫວວຽກງານ 5 ປີ (2026-2030) ຂອງອົງການກວດກາລັດແຂວງ ແລະ ອົງການກວດສອບ ປະຈຳພາກໃຕ້, ກອງປະຊຸມສະແດງຄວາມຊົມເຊີຍຕໍ່ຜົນສໍາເລັດໃນໄລຍະຜ່ານມາ ແລະ ເປັນເອກະພາບຕໍ່ທິດທາງ, ແຜນການເຄື່ອນໄຫວຂອງສອງອົງການໃນ 5 ປີ ຕໍ່ໜ້າ, ກອງປະຊຸມໄດ້ສະເໜີ 2 ອົງການເອົາໃຈໃສ່ຄົ້ນຄວ້າການສ້າງ, ປັບປຸງກົດໝາຍ ໃນຂົງເຂດຕົນຮັບຜິດຊອບ, ຊຸກຍູ້ການແກ້ໄຂຜົນກວດກາ, ຜົນການກວດສອບ, ເພີ່ມທະວີການກວດກາ ປົກກະຕິ, ກວດກາແຕ່ຫົວທີ່ບັນດາໂຄງການລົງທຶນທີ່ຂື້ນກັບແຂວງຄຸ້ມຄອງ, ເພື່ອບໍ່ໃຫ້ເກີດຄວາມສ່ຽງຈະສ້າງໜີ້ສິນເພີ່ມເຕີ່ມ, ຖືເອົາການແກ້ໄຂຜົນການສອບເປັນເງື່ອນໄຂ, ບ່ອນອີງໃນການຕີລາຄາ ແລະ ປະເມີນຜົນໃນການປະຕິບັດໜ້າທີ່ຂອງພະນັກງານ-ລັດຖະກອນ 2 ອົງການ. ນອກນັ້ນ, ຍັງໄດ້ສະເໜີໃຫ້ 2 ອົງການສືບຕໍ່ເພີ່ມທະວີບຳລຸງສ້າງພະນັກງານ-ລັດຖະກອນ ໃຫ້ມີຄຸນທາດການເມືອງ, ຈັນຍາບັນ-ຈັນຍາທໍາ ແລະ ມີຄວາມ ຊຳນານທາງດ້ານວິຊາສະເພາະ, ເປັນມືອາຊີບ. ເພື່ອສ້າງຄວາມເຊື່ອໝັ້ນ ແລະ ຮັບປະກັນໃຊ້ການປະຕິບັດວຽກງານຂອງ 2 ອົງການ ໃຫ້ມີຄວາມເຂັ້ມແຂງຂຶ້ນເລື້ອຍໆ, ພ້ອມທັງຫັນວຽກງານຂອງ 2 ອົງການດັ່ງກ່າວ ໃຫ້ມີຄວາມວ່ອງໄວທັນສະໃໝ, ໂປ່ງໃສ, ທັນເວ ລາ ແລະ ສາມາດຮັບປະກັນຄວາມຖືກຕ້ອງຕາມກົດໝາຍ.
ກອງປະຊຸມໄດ້ພິຈາລະນາ ແລະ ຮັບຮອງແຜນການເຄື່ອນໄຫວວຽກງານ 5 ປີ (2026-2030) ຂອງ ອົງການໄອຍະການປະຊາຊົນແຂວງ ແລະ ສານປະຊາຊົນແຂວງ, ກອງປະຊຸມໄດ້ເຫັນດີເປັນເອກະພາບຕໍ່ທິດທາງລວມ, ຄາດໝາຍສູ້ຊົນ ແລະ ມາດຕະການຈັດຕັ້ງປະຕິບັດ. ເພື່ອຮັບປະກັນໃນການຈັດຕັ້ງປະຕິບັດແຜນການເຄື່ອນໄຫວໃນ 5 ປີຕໍ່ໜ້າ, ກອງປະຊຸມສະເໜີໃຫ້ ອົງການໄອຍະການປະຊາຊົນແຂວງ ແລະ ສານປະ ຊາຊົນແຂວງ, ສືບຕໍ່ເອົາໃຈໃສ່ການສຶກສາອົບຮົມການເມືອງ-ແນວຄິດໃຫ້ແກ່ພະນັກງານ-ລັດຖະກອນຂອງຕົນໃຫ້ມີຄຸນນະພາບ, ມີຄວາມເຂັ້ມແຂງ, ມີຄວາມຮູ້, ຄວາມສາມາດ, ມີຄຸນສົມບັດ, ມີຈັນຍາບັນ-ຈັນຍາທໍາ ຂອງພະນັກງານ-ລັດຖະກອນ ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ໃຫ້ເປັນມືອາຊີບຢ່າງແທ້ຈິງ.
ກອງປະຊຸມໄດ້ພິຈາລະນາ ແລະ ຮັບຮອງແຜນການເຄື່ອນໄຫວວຽກງານ 5 ປີ (2026-2030) ຂອງສະພາປະຊາຊົນແຂວງອັດຕະປື, ເພື່ອເປັນບ່ອນອີງພື້ນຖານໃຫ້ແກ່ການເຄື່ອນໄຫວວຽກງານຂອງສະພາປະຊາຊົນແຂວງອັດຕະປື ໃນ 5 ປີຕໍ່ໜ້າ ໂດຍໄດກຳນົດ 5 ແຜນງານ 25 ໂຄງການ, ເພື່ອຮັບປະກັນ ແລະ ຍົກສູງຄຸນນະພາບການເຄື່ອນໄຫວວຽກງານ ຂອງສະພາປະຊາຊົນແຂວງ ໃຫ້ມີປະສິດທິພາບ, ມີປະສິດທິຜົນຂຶ້ນເລື້ອຍໆ, ພິຈາລະນາ, ຮັບຮອງເອົາແຜນການສ້າງ ແລະ ປັບປຸງກົດໝາຍ 5 ປີ (2026-203) ຂອງ ສະພາປະຊາຊົນແຂວງອັດຕະປື ຈຳນວນ 7 ສະບັບ. ໃນນັ້ນ, ສ້າງໃໝ່ 6 ສະບັບ (ບໍ່ມີສະບັບການປັບປຸງ), ເຊິ່ງກວມເອົາຂົງເຂດການປົກຄອງ ແລະ ຍຸຕິທໍາ ມີ 1 ສະບັບ, ຂົງເຂດເສດຖະກິດ ມີ 3 ສະບັບ, ຂົງເຂດວັດທະນະທໍາ-ສັງຄົມມີ 2 ສະບັບ ແລະ ຂົງເຂດປ້ອງກັນຊາດ-ປ້ອງກັນຄວາມສະຫງົບມີ 1 ສະບັບ. ເພື່ອຮັບປະກັນການຈັດຕັ້ງປະຕິບັດແຜນການສ້າງ ແລະ ປັບປຸງນິຕິກຳໃຕ້ກົດໝາຍ ໃນຄັ້ງນີ້ຄະນະກຳມະການປົກຄອງແຂວງ ແລະພາກສ່ວນທີ່ກ່ຽວຂ້ອງຕ້ອງເອົາໃຈໃສ່ເປັນເຈົ້າການແຕ່ຫົວທີໃນການສ້າງ ແລະ ປັບປຸງນິຕິກຳໃຕ້ກົດໝາຍທີ່ຢູ່ໃນຄວາມຮັບຜິດຊອບຂອງຕົນ, ພ້ອມທັງ ເປັນເຈົ້າການປະສານສົມທົບ ຮ່ວມກັບຄະນະກຳມະການທີ່ກ່ຽວຂ້ອງຂອງສະພາປະຊາຊົນແຂວງ ກວດກາຄວາມພ້ອມດ້ານເນື້ອໃນ ຂອງນິຕິກຳໃຕ້ກົດໝາຍ, ສາມາດຮັບປະກັນເຮັດໃຫ້ເປັນລັດທີ່ປົກຄອງດ້ວຍກົດໝາຍ ແລະ ນິຕິກຳໃຕ້ກົດໝາຍ. ນອກຈາກການພິຈາລະນາ, ຮັບຮອງເອົາບັນຫາສໍາຄັນຂອງທ້ອງຖິ່ນແລ້ວ.
ຜົນສໍາເລັດຂອງກອງປະຊຸມໃນຄັ້ງນີ້, ຖືເປັນໝາກຜົນແຫ່ງການລວມໝູ່ພາຍໃນອົງການອໍານາດລັດຂັ້ນທ້ອງຖິ່ນຂອງພວກເຮົາ, ກໍ່ຄືການຍົກສູງຄວາມເປັນເຈົ້າການຂອງບັນດາທ່ານ ສະມາຊິກສະພາປະຊາຊົນແຂວງເຂົ້າໃນການຄົ້ນຄວ້າ ແລະຮັບຮອງເອົາແຕ່ລະເນື້ອໃນສໍາຄັນ ທີ່ນໍາມາພິຈາລະນາໃນກອງປະຊຸມຄັ້ງນີ້, ບົນພື້ນຖານຍຶດຜົນປະໂຫຍດລວມຂອງປະຊາຊົນລາວບັນດາເຜົ່າໃນທົ່ວແຂວງອັດຕະປື.
ຂ່າວ: ທິດປະສົງ
ພາບ: ວົງສະໄໝ