ວັນທີ 11 ພະຈິກ 2026, ສະຫາຍ ພັນໂທ ຮວິ່ງ ກິມ ຫ້າຍ ຮອງຫົວກອງບັນຊາການທະຫານແຂວງກວາງຫງາຍ ກອງທັບປະຊາຊົນຫວຽດນາມ ພ້ອມຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ກອງບັນຊາການທະຫານແຂວງອັດຕະປື ໂດຍມີສະຫາຍ ພົ.ວ ສີສົມໃຈ ມະໂນລາ ຄະນະປະຈຳພັກແຂວງ, ເລຂາພັກ ແລະ ຫົວໜ້າການເມືອງ ກອງບັນຊາການທະຫານແຂວງອັດຕະປື ພ້ອມຄະນະ ໃຫ້ການຕ້ອນຮັບ.
ໃນກອງປະຊຸມ ຕາງໜ້າສອງຝ່າຍໄດ້ຜັດປ່ຽນກັນລາຍງານຜົນການຈັດຕັ້ງປະຕິບັດວຽກງານຜ່ານມາ ໂດຍສະເພາະວຽກງານປ້ອງກັນຊາດ-ປ້ອງກັນຄວາມສະຫງົບ ໃນຖານະເປັນເຂດທີ່ມີທີ່ຕັ້ງທາງຍຸດທະສາດສຳຄັນ. ຜ່ານມາ ກອງບັນຊາການທະຫານແຂວງອັດຕະປືໄດ້ເຮັດໜ້າທີ່ເສນາ ທິການໃຫ້ແກ່ຄະນະພັກ ແລະ ອຳນາດການປົກຄອງທ້ອງຖິ່ນ ໃນການນຳພາ-ຊີ້ນຳວຽກງານປ້ອງ ກັນຊາດ ແລະ ການທະຫານທ້ອງຖິ່ນ, ສ້າງເຂດປ້ອງກັນແຂວງ ແລະ ຕາແສງໃຫ້ໝັ້ນຄົງເຂັ້ມແຂງ, ປະສານສົມທົບກັບກຳລັງຕ່າງໆໃນການຮັກສາຄວາມສະຫງົບ, ຄວາມເປັນລະບຽບຮຽບ ຮ້ອຍຂອງສັງຄົມ ແລະ ສ້າງເງື່ອນໄຂເອື້ອອຳນວຍຕໍ່ການພັດທະນາເສດຖະກິດ-ສັງຄົມ.
ພ້ອມນັ້ນ ຍັງໄດ້ເອົາໃຈໃສ່ຮັກສາລະບຽບວິໄນ, ລະບອບການກຽມພ້ອມປ້ອງກັນຊາດ, ການກຽມພ້ອມປ້ອງກັນໄພທາງອາກາດ ແລະ ການກຽມພ້ອມຮັບມືກັບໄພພິບັດຢ່າງເຄັ່ງຄັດ, ພາຍຫຼັງການປຶກສາຫາລື ສອງຝ່າຍໄດ້ເຫັນດີຮ່ວມກັນລົງນາມໃນບົດບັນທຶກຊ່ວຍຈຳ ເພື່ອເປັນພື້ນຖານໃນການສືບຕໍ່ຮ່ວມມື, ແລກປ່ຽນບົດຮຽນ ແລະ ຫັດແໜ້ນສາຍພົວພັນມິດຕະພາບລະຫວ່າງສອງກອງບັນຊາການໃຫ້ແໜ້ນແຟ້ນຍິ່ງຂຶ້ນ.
ໂອກາດດັ່ງກ່າວ ກອງບັນຊາການທະຫານແຂວງກວາງຫງາຍ ຍັງໄດ້ມອບທຶນຊ່ວຍເຫຼືອຈຳນວນ 500 ລ້ານດົ້ງ ໃຫ້ແກ່ກອງບັນຊາການທະຫານແຂວງອັດຕະປື ເພື່ອນຳໄປປັບປຸງ ແລະ ກໍ່ສ້າງກົມກອງ.
ການພົບປະໃນຄັ້ງນີ້ ນັບເປັນການສືບຕໍ່ເສີມສ້າງສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືອັນດີ ລະຫວ່າງ ກອງທັບປະຊາຊົນລາວ ແລະ ຫວຽດນາມ.
ຂ່າວ: ແສງຫຼ້າ ກຸວົງສາ