ກອງປະຊຸມໃຫຍ່ຜູ້ແທນອົງຄະນະພັກເມືອງ ສະໜາມໄຊ ແຂວງອັດຕະປື ຄັ້ງທີ XIII ໄດ້ດຳເນີນມາແຕ່ວັນທີ 18 ແລະ ໄດ້ສຳເລັດລົງຢ່າງຈົບງາມ ໃນວັນທີ 19 ມີນາ ນີ້ ໂດຍການເປັນປະທານຂອງສະ ຫາຍ ສຸລິວົງ ອະໄພວົງ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໆສະໜາມໄຊ, ເປັນກຽດເຂົ້າຮ່ວມຊີ້ນຳກອງປະຊຸມມີ ສະຫາຍ ພົທ ວັນທອງ ກອງມະນີ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື, ມີບັນດາການນຳຂັ້ນແຂວງ,ເມືອງ, ແຂກຖືກເຊີນ, ພ້ອມດ້ວຍຜູ້ແທນສົມບູນຈຳ ນວນ 119 ສະຫາຍ ຊຶ່ງເປັນຕົວແທນໃຫ້ແກ່ສະມາຊິກພັກໃນທົ່ວເມືອງເຂົ້າຮ່ວມ.
ກອງປະຊຸມໃຫຍ່ຜູ້ແທນອົງຄະນະພັກເມືອງ ຄັ້ງທີ XIII ໄດ້ສະຫຼູບຕີລາຄາຄືນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XII ຂອງອົງຄະນະພັກເມືອງຕະຫຼອດໄລຍະ 5 ປີຜ່ານມາ ເຫັນໄດ້ວ່າ ຮ່າງບົດລາຍ ງານການເມືອງທັງສອງພາກ, ບົດສຳຫຼວດນຳພາ-ຊີ້ນຳ ແລະ ທິດທາງແຜນການຄາດໝາຍສູ້ຊົນແຕ່ລະດ້ານໃນຕໍ່ໜ້າ 2025-2029 ໃນ 5 ປີຜ່ານມາ ອົງຄະນະພັກສາມາດໄດ້ຜົນສໍາເລັດຫຼາຍດ້ານ ເປັນຕົ້ນ ທົ່ວເມືອງ ແມ່ນມີສະຖຽນລະພາບທາງດ້ານການເມືອງອັນໜັກແໜ້ນ, ທົ່ວສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດ ຖະກິດ-ສັງຄົມ ມີການພັດທະນາດ້ວຍບາດກ້າວ ແລະ ທ່ວງທ່າໃໝ່, ປະຊາຊົນບັນ ດາເຜົ່າມີຄວາມສາມັກຄີປອງດອງ, ພື້ນຖານໂຄງລ່າງຂອງເມືອງກໍ່ໄດ້ຮັບການປັບປຸງແກ້ໄຂ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂື້ນເປັນກ້າວໆ, ເສດຖະກິດຂອງເມືອງ ສືບຕໍ່ຂະຫຍາຍຕົວຢ່າງຕໍ່ເນື່ອງ ສະເລ່ຍຢູ່ໃນລະດັບ 5,75% ຕໍ່ປີ, ລວມຍອດຜະລິດຕະພັນພາຍໃນ ບັນລຸໄດ້ 493,71 ຕື້ກີບ, ລື່ນແຜນ 163,33 ຕື້ກີບ ເທົ່າກັບ 49,43%, ໃນນັ້ນ: ຂະແໜງ ກະສິກຳ 236,50 ຕື້ກີບ ກວມເອົາ 47,91% ຂອງ GDP, ຂະແໜງອຸດສາຫະກຳ 162,49 ຕື້ກີບ, ກວມເອົາ 32,91% ຂອງ GDP ແລະ ຂະແໜງບໍລິການ 94,70 ຕື້ກີບ ກວມເອົາ 19,18% ຂອງ GDP, ສະເລ່ຍລາຍຮັບຕໍ່ຫົວຄົນ 1.095 $/ຄົນ/ປີ ຫຼື 23,52 ລ້ານ/ຄົນ/ປີ ເກີນແຜນ 176 $ ເທົ່າກັບ 19,15% (ແຜນ 919 $) ເພີ່ມຂຶ້ນຈາກ 5 ປີຜ່ານມາ 335 $ ເທົ່າກັບ 44,07%.
ກອງປະຊຸມຍັງໄດ້ເປັນເອກະສັນກັນຮັບຮອງແຜນການພັດທະນາເສດຖະກິດ-ສັງຄົມ 5 ປີ ຕໍ່ໜ້າ ແຕ່ປີ 2025- 2029 ເຊິ່ງຄາດໝາຍສູ້ຊົນຕົ້ນຕໍທາງດ້ານເສດຖະກິດ ສະເລ່ຍເພີ່ມຂຶ້ນໃນລະດັບ 8-8,5% ຕໍ່ປີລວມຍອດຜະລິດຕະພັນພາຍໃນ (GDP) ໃຫ້ບັນລຸ 725,42 ຕື້ກີບ; ຄາດຄະເນພົນລະເມືອງ ຮອດປີ 2029 ປະມານ 45,719 ຄົນ, ລາຍຮັບສະເລ່ຍຕໍ່ຫົວຄົນ ໃຫ້ໄດ້ 1,479 $/ຄົນ/ປີ, ໃນນີ້: ຂະແໜງກະສິກຳ ເພີ່ມຂື້ນ 11,34%ປີ; ກວມເອົາ 51,06% ຂອງ GDP, ຂະ ແໜງອຸດສາຫະກຳ ເພີ່ມຂື້ນ 19,09%/ປີ; ກວມເອົາ 33,68% ຂອງ GDP ແລະ ຂະແໜງ ບໍລິການ ໃຫ້ເພີ່ມຂື້ນ 3,36%/ປີ; ກວມເອົາ 15.24% ຂອງ GDP.
ກອງປະຊຸມໃຫ່ຍຄັ້ງນີ້ຍັງໄດ້ປ່ອນບັດເລືອກເອົາຄະນະບໍລິຫານງານພັກເມືອງ ຊຸດທີ XIII ເຊິ່ງລວມມີຜູ້ສະໝັກເລືອກຕັ້ງ 29 ສະຫາຍ, ສາມາດເລືອກໄດ້ຢ່າງສົມບູນ 25 ສະຫາຍ, ຍິງ 4 ສະຫາຍ ແລະ ເລືອກເອົາຄະນະປະຈຳພັກເມືອງຈຳນວນ 7 ສະຫາຍ, ຍິງ 1 ສະຫາຍ, ຜ່ານໃນການດຳເນີນກອງປະຊຸມຄັ້ງປະຖົມມະລຶກ ກອງປະຊຸມໄດ້ເລືອກເອົາ ສະຫາຍ ສຸລິວົງ ອະໄພວົງ ເປັນເລຂາຄະນະບໍລິຫານງານພັກເມືອງ; ສະຫາຍ ພັທ ຄຳໂພໄຊ ໄຊຍະເສນາ ເປັນຮອງເລຂາຄະນະບໍລິຫານງານພັກເມືອງ; ສະຫາຍ ນ ພູດອນ ຈູມມະລີ ເປັນຮອງເລຂາຄະນະບໍລິຫານງານພັກເມືອງ, ສະຫາຍ ຈັນທະພອນ ຈ່ອຍຄຳລຽນ ເປັນປະທານຄະ ນະກວດກາພັກເມືອງ, ສະຫາຍ ໄກສິດ ສີດາເພັດ ເປັນຮອງປະທານຄະນະກວດກາພັກເມືອງ, ສະຫາຍ ຄຳຕັນ ໄຊຍະລາດ ເປັນຮອງປະທານຄະນະກວດກາພັກເມືອງ ແລະ ເລືອກໄດ້ຜູ້ ແທນສົມບູນຮ່ວມກອງປະຊຸມໃຫຍ່ ອົງຄະນະພັກແຂວງ 13 ສະຫາຍ, ຍິງ 3 ສະຫາຍ ແລະ ສຳຮອງອີ 2 ສະຫາຍ.
ກອງປະຊຸມໃຫຍ່ສຳຄັນຄັ້ງນີ້ ສະຫາຍ ພົທ ວັນທອງ ກອງມະນີ ກຳມະການສູນກາງພັກ ເລຂາພັກແຂວງ ເຈົ້າແຂວງ ອັດຕະປື ໄດ້ໂອ້ລົມໃຫ້ທິດຊີ້ນຳການຈັດຕັ້ງປະຕິບັດໜ້າທີ່ໃນຕໍ່ໜ້າ ໂດຍຮຽກຮ້ອງໃຫ້ຜູ້ແທນອົງ ຄະນະພັກເມືອງ ຊຸດທີ XIII ສືບຕໍ່ເອົາໃຈໃສ່ນຳພາ- ຊີ້ນຳໃຫ້ໄດ້ຮັບຜົນສຳເລັດ ຕາມຄາດໝາຍທີ່ວາງໄວ້, ພ້ອມກັນຂຸດຄົ້ນ ແລະ ນຳໃຊ້ທ່າແຮງບົ່ມຊ້ອນທີ່ມີຂອງເມືອງເຂົ້າໃນການພັດທະນາພື້ນຖານໂຄງລາງຕິດພັນກັບການບໍ່ລິການ, ຊຸກຍູ້ສົ່ງເສີມກະສິກຳທີ່ມີຄຸນ ນະພາບ, ເພີ່ມການເຕີບໂຕ ແລະ ສ້າງລາຍຮັບທີ່ໝັ້ນຄົງໃຫ້ແກ່ຜູ້ຜະລິດກະສິກຳ ໂດຍປະຕິບັດນະໂຍບາຍຂອງລັດຖະບານ ກ່ຽວກັບການພັດທະນາກະສິກຳ ຕາມ ທິດສະອາດ-ສີຂຽວ ແລະ ຍືນຍົງ, ເວົ້າສະເພາະ ແມ່ນການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ປີ 2025-2029 ໃຫ້ຮັບປະກັນໃນດ້ານສະມັດຕະ ພາບຜົນຜະລິດເປັນສິນຄ້າສະໜອງທັງພາຍໃນ ແລະ ສົ່ງອອກ ເພື່ອຊອກວິທີທາງຊ່ວຍເຫຼືອປະຊາຊົນ ແລະ ຜູ້ປະກອບການດ້ານການຜະລິດກະ ສິກຳ ໃຫ້ນັບມື້ພັດທະນາດ້ານຄຸນນະພາບການຜະລິດ ສອດຄ່ອງກັບຄວາມຕ້ອງການຂອງຕະຫຼາດເປົ້າໝາຍ ແລະ ເງື່ອນໄຂກ້າວສູ່ຕະຫຼາດທັງພາກພື້ນ ແລະ ສາ ກົນ, ພ້ອມກັນສຸມໃສ່ພັດທະນາ ໃນຫລາຍຂົງເຂດບຸລິມະສິດ ເພື່ອສ້າງເສດຖະກິດເອກະລາດເປັນ ເຈົ້າຕົນເອງໃນໄລຍະໃໝ່ ເພື່ອກ້າວໄປສູ່ການເພິ່ງຕົນເອງ, ກຸ້ມຕົນເອງ ທາງດ້ານປະລິມານ, ສຸມໃສ່ການຜະລິດກະສິກຳ ເພື່ອຄໍ້າປະກັນສະບຽງອາຫານ ແລະ ຜະລິດເປັນສິນຄ້າ, ໃຫ້ປະຊາຊົນບັນດາເຜົ່າມີລາຍຮັບ ແລະ ລຸດພົ້ນອອກຈາກຄວາມທຸກຍາກໄປເທື່ອລະກ້າວ.
ໂດຍ: ໄພບູນ