ໃນວັນທີ 11ມີນາ 2026 ນີ້ ທ່ານ ໂພໄຊ ໄຊຍະສອນ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ເຄື່ອນໄຫວພົບປະໂອ້ລົມພະນັກງານ-ລັດຖະກອນ ພະແນກ ແຮງງານ ແລະ ສະຫວັດດີການສັງຄົມ ແຂວງອັດຕະປື, ໂດຍການຕ້ອນຮັບຂອງ ທ່ານ ນາງ ພອນມະນີ ຂຽນໄຊຍະວົງ, ຫົວໜ້າພະແນກ ແຮງງານ ແລະສະຫວັດດີການສັງຄົມແຂວງ, ພ້ອມດ້ວຍຄະນະພະແນກ ແລະ ພະນັກງານຫຼັກແຫຼ່ງເຂົ້າຮ່ວມໃຫ້ການຕ້ອນຮັບ.
ໂອກາດນີ້ ທ່ານ ໂພໄຊ ໄຊຍະສອນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ທີ່ຄະນະພັກ, ຄະນະພະແນກ ຕະຫຼອດຮອດພະນັກງານ-ລັດຖະກອນ ພາຍໃນພະແນກ ຮສສ ແຂວງອັດຕະປື ຍາດມາໄດ້ໃນໄລຍະຜ່ານມາ, ເຖິງວ່າຈະປະເຊີນກັບສິ່ງທ້າທາຍຈາກສະພາບເສດຖະກິດ- ການເງິນ ແລະ ໄພທຳມະຊາດ ແຕ່ການປະຕິບັດໜ້າທີ່ວຽກງານຂົງເຂດແຮງງານ ແລະ ສະຫວັດດີການສັງ ຄົມພາຍໃນແຂວງອັດຕະປື ກໍ່ສາມາດປະສົບຜົນສໍາເລັດໄດ້ຕາມແຜນການທີ່ວາງໄວ້.
ພ້ອມນັ້ນທ່ານລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ຍັງໄດ້ເນັ້ນໜັກໃຫ້ຄະນະພັກ, ຄະນະນຳ ແລະ ພະນັກງານທຸກຂັ້ນພາຍໃນພະແນກ ແຮງງານ ແລະ ສະຫວັດດີການສັງຄົມແຂວງອັດຕະປື ຈົ່ງສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກກະຊວງ ຮສສ ແລະ ແຜນພັດທະນາວຽກງານ ຮສສ 5 ປີ (2026-2030) ໃຫ້ປາກົດຜົນເປັນຈິງ. ທ່ານຍັງມີທິດຊີ້ນຳທີ່ສຳຄັນໃນ 4 ວຽກງານຈຸດສຸມ ຄື: ດ້ານວຽກງານການເມືອງ-ແນວຄິດ ແລະ ການຈັດຕັ້ງ ເພີ່ມທະວີຄວາມສາມັກຄີ ເປັນເອກະພາບ, ປັບປຸງແບບແຜນວິທີເຮັດວຽກ ໃຫ້ກະທັດຮັດ ແລະ ມີປະສິດທິພາບ, ເນັ້ນການກໍ່ສ້າງພະນັກງານສືບທອດ ທີ່ໜັກແໜ້ນທາງດ້ານຄຸນທາດການເມືອງ ແລະ ມີຈັນຍາບັນວິຊາຊີບ, ດ້ານວຽກງານແຮງງານ ເລັ່ງໂຄສະນາ ແລະ ພັດທະນາສີມືແຮງງານ ໃຫ້ມີຄຸນນະພາບ ເພື່ອຕອບສະໜອງຄວາມຕ້ອງການຂອງຕະຫຼາດແຮງງານ ທັງພາຍໃນ ແລະ ຕ່າງປະເທດ, ໂດຍເນັ້ນໃສ່ການສ້າງວຽກເຮັດງານທຳທີ່ໝັ້ນຄົງ, ດ້ານວຽກງານນະໂຍບາຍ ແລະ ສະຫວັດດີການ ໃຫ້ສືບຕໍ່ຈັດຕັ້ງປະຕິບັດນະໂຍບາຍຕໍ່ຜູ້ມີຜົນງານ, ຜູ້ພິການ ແລະ ຜູ້ສູງອາຍຸ ຢ່າງທົ່ວເຖິງ, ໂປ່ງໃສ ແລະ ຍຸຕິທຳ ໂດຍອີງໃສ່ຖານຂໍ້ມູນທີ່ຊັດເຈນ ແລະ ຖືກ ຕ້ອງຕາມລະບຽບການ, ດ້ານວຽກງານປະກັນສັງຄົມ ກໍ່ໃຫ້ສືບຕໍ່ຂະຫຍາຍຕາໜ່າງການປົກຄຸມປະກັນສັງຄົມໃຫ້ກວ້າງຂວາງ, ປັບປຸງການບໍລິການໃຫ້ທັນສະໄໝ ແລະ ຮັບປະກັນຄວາມຍືນຍົງຂອງກອງທຶນ ເພື່ອເປັນບ່ອນອີງທີ່ໝັ້ນຄົງໃຫ້ແກ່ຜູ້ອອກແຮງງານ. ເພີ່ມທະວີຄວາມຮັບ ຜິດ ຊອບຕໍ່ໜ້າທີ່ການເມືອງ, ເປັນເຈົ້າການໃນການບໍ ລິຫານລັດດ້ວຍກົດໝາຍ ແລະ ຮ່ວມແຮງຮ່ວມໃຈກັນພັດທະນາຂະແໜງການແຮງງານ ແລະ ສະຫວັດດີການສັງຄົມ ໃຫ້ມີບາດກ້າວຂະຫຍາຍຕົວໃໝ່ທີ່ເຂັ້ມແຂງກວ່າເກົ່າ.
ຂ່າວ: ມະນີວອນ
# ptatp.gov.la