ວັນທີ 11 ມີນາ 2026 ນີ້, ທ່ານ ໂພໄຊ ໄຊຍະສອນ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ເຄື່ອນໄຫວຢ້ຽມຢາມ ແລະ ຕິດຕາມການດຳເນີນງານຂອງ ບໍລິສັດ ລົງທຶນ ແລະ ຜະລິດທຸລະກິດກະສິກຳ ພາກໃຕ້ລາວ ຈຳກັດຜູ້ດຽວ(THACO) ຢູ່ເມືອງໄຊເສດຖາ, ແຂວງອັດຕະປື ເພື່ອຊຸກຍູ້ການພັດທະນາສີມືແຮງງານ ແລະ ການປະຕິບັດນະໂຍບາຍສະຫວັດດີການ ໃຫ້ແກ່ກຳມະກອນລາວ.
ໂອກາດດັ່ງກ່າວທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຮັບຟັງການລາຍງານຈາກບໍລິສັດ ກ່ຽວກັບສະພາບການລົງທຶນ ແລະ ແຜນການພັດທະນາທີ່ພົ້ນເດັ່ນ ໂດຍສະເພາະແມ່ນ ໂຄງການປູກກ້ວຍສົ່ງອອກ ທີ່ຄາດວ່າຍັງຈະຂະຫຍາຍຕົວຢ່າງຕໍ່ເນື່ອງ, ໃນປີ 2026 ບໍລິສັດ ມີແຜນຈະຂະຫຍາຍເນື້ອທີ່ປູກກ້ວຍໃຫ້ໄດ້ 3,454 ເຮັກ ຕາ ຄາດຜົນຜະລິດສົ່ງອອກສູງເຖິງ 98,395 ໂຕນ, ດ້ານສະພາບແຮງງານ ແລະ ສະຫວັດດີການ ປັດຈຸບັນ ບໍລິສັດມີແຮງງານທັງໝົດ 7,100 ຄົນ, ສິ່ງທີ່ໜ້າສົນໃຈແມ່ນແຜນຄວາມຕ້ອງການແຮງງານໃນອະນາ ຄົດທີ່ຈະເພີ່ມຂຶ້ນຢ່າງກ້າວກະໂດດ ເພື່ອຮອງຮັບການຂະຫຍາຍຕົວຂອງການຜະລິດ ແລະ ການລ້ຽງສັດ. ໃນນີ້ ປີ 2026 ທາງບໍລິສັດຕ້ອງການແຮງງານ 14,300 ຄົນ, ປີ 2028 ຕ້ອງການແຮງງານເພີ່ມຂຶ້ນເຖິງ 25,000 ຄົນ. ນອກຈາກການສ້າງວຽກເຮັດງານທຳແລ້ວ ບໍລິສັດຍັງໄດ້ລາຍງານເຖິງ ລະດັບລາຍຮັບ ເລີ່ມຕົ້ນແຕ່ 5 ລ້ານກີບ ຫາ 15 ລ້ານກີບ ຕາມຕຳແໜ່ງງານ ແລະ ວິຊາສະເພາະ. ພ້ອມກັນນັ້ນ, ບໍລິສັດຍັງໄດ້ເອົາໃຈໃສ່ດ້ານນະໂຍບາຍສະຫວັດດີການ ຢ່າງຮອບດ້ານ ເປັນຕົ້ນແມ່ນ ການຈັດສັນທີ່ພັກອາໄສ (ຫໍພັກ) ທີ່ມີໄຟຟ້າ-ນ້ຳປະປາ ຊົມໃຊ້ໂດຍບໍໄດ້ເສຍຄ່າ, ສະໜັບສະໜູນອາຫານ 3 ຄາບ/ວັນ, ມີສູນຝຶກອົບຮົມວິຊາຊີບກ່ອນເຂົ້າເຮັດວຽກ ແລະ ບໍລິການກວດສຸຂະພາບປະຈຳປີ, ມີນະໂຍບາຍຊ່ວຍເຫຼືອຄ່າເດີນທາງ ແລະ ລົດຮັບ-ສົ່ງ ໃນໄລຍະເທດສະການບຸນປີໃໝ່ລາວ.
ໂອກາດດັ່ງກ່າວ ທ່ານ ໂພໄຊ ໄຊຍະສອນ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ກ່າວສະແດງຄວາມຊົມເຊີຍຕໍ່ບໍລິ ສັດ ທີ່ໄດ້ປະກອບສ່ວນສຳຄັນໃນການສ້າງວຽກເຮັດງານທຳໃຫ້ແກ່ປະຊາຊົນໃນທ້ອງຖິ່ນ ແລະ ແຮງງານລາວຈາກທົ່ວປະເທດ. ທ່ານຍັງໄດ້ເນັ້ນໜັກໃຫ້ບໍລິສັດ ສືບຕໍ່ປັບປຸງເງື່ອນໄຂການເຮັດວຽກໃຫ້ມີຄວາມປອດໄພ, ປະຕິບັດກົດໝາຍແຮງງານຢ່າງເຄັ່ງຄັດ ແລະ ຮຽກຮ້ອງໃຫ້ມີການຮ່ວມມືກັບພາກລັດໃນການຝຶກອົບ ຮົມສີມືແຮງງານ ເພື່ອສ້າງກຳລັງການຜະລິດທີ່ມີຄຸນນະພາບ ຕອບສະໜອງໃຫ້ແກ່ໂຄງການລົງທຶນຂະໜາດໃຫຍ່ໃນ ສປປ ລາວ. ຈຸດເດັ່ນທີ່ຄວນເອົາມາເຮັດເປັນ Infographic ຫຼື ຂໍ້ມູນສະຫຼຸບ ເປົ້າໝາຍປີ 2028 ຮັບແຮງງານໃຫ້ໄດ້ 25,000 ຄົນ, ລາຍຮັບ ກຸ່ມນັກວິ ຊາການ/ວິສະ ວະກອນ ສູງເຖິງ 12 – 15 ລ້ານກີບ, ແຜນງົບປະມານລົງທຶນແຕ່ປີ 2026-2028 ສູງເຖິງ 538 ລ້ານໂດລາສະຫະລັດ, ທ່ານຍັງໄດ້ເນັ້ນໜັກໃຫ້ຄະນະຜູ້ບໍລິຫານບໍລິສັດ ເອົາໃຈໃສ່ເປັນພິເສດຕໍ່ກັບ ການເບິ່ງແຍງຊີວິດການເປັນຢູ່ ແລະ ນະໂຍບາຍຕ່າງໆ ຕໍ່ກັບແຮງງານໃຫ້ດີ, ການທີ່ບໍລິສັດມີແຜນຂະຫຍາຍຕົວຢ່າງໃຫຍ່ຫຼວງນັ້ນເປັນເລື່ອງທີ່ດີ, ແຕ່ສິ່ງທີ່ສຳຄັນກວ່ານັ້ນແມ່ນການເຮັດໃຫ້ແຮງງານລາວມີຄວາມສຸກ, ມີຄວາມໝັ້ນຄົງ ແລະ ມີຄຸນນະພາບຊີວິດທີ່ດີຂຶ້ນ, ບໍລິສັດຕ້ອງຮັບປະກັນວ່າທຸກນະໂຍບາຍ ບໍ່ວ່າຈະເປັນເລື່ອງທີ່ພັກ, ອາຫານ, ສຸຂະພາບ ແລະ ລາຍຮັບ ຕ້ອງໄດ້ຮັບການຈັດຕັ້ງປະຕິບັດຢ່າງທົ່ວເຖິງ ແລະ ຍຸຕິທຳ ເພື່ອໃຫ້ເຂົາເຈົ້າຮູ້ສຶກຮັກ ແລະ ຢາກຝາກຊີວິດໄວ້ກັບບໍລິສັດໃນໄລຍະຍາວ, ບໍລິສັດຕ້ອງຕິດຕາມກວດກາສະພາບແວດລ້ອມການເຮັດວຽກໃຫ້ມີຄວາມປອດໄພ (Safety first) ແລະ ສືບຕໍ່ປັບປຸງລະບົບສະຫວັດດີການຕ່າງໆ ໃຫ້ສອດຄ່ອງກັບສະພາບຄ່າຄອງຊີບໃນປັດຈຸບັນ ເພື່ອເປັນຕົວແບບທີ່ດີໃຫ້ແກ່ການລົງທຶນດ້ານກະສິກຳຂະໜາດໃຫຍ່ໃນ ສປປ ລາວ.
ຂ່າວ: ມະນີວອນ