ວັນທີ 21 ເມສາ 2026, ກົງກັບມື້ ຂື້ນ 5 ຄ່ຳ ເດືອນ 6 ລາວ ພສ 2569 ຢູ່ທີ່ວັດອົງແສນສຸກຂະຣາມ ບ້ານຊະແຄະ ເມືອງໄຊເສດຖາ, ແຂວງອັດຕະປື ໄດ້ຈັດພິທີປ່ຽນຜ່າບ່ຽງ ແລະ ອັງເຊີນພຣະເຈົ້າໃຫຍ່ພຣະພຸດທະຮູຍອົງແສນ ຂຶ້ນປະດິດສະຖານສູ່ບັນລັງທີ່ນັ່ງພັດທະສີມາ, ພາຍຫຼັງຈາກ ການຫົດສົງ ເປັນເວລາ 7 ວັນ ຕາມປະເພ ນີບຸນປີໃໝ່ລາວ, ໂດຍມື້ນີ້ເປັນວັນຄົບຮອບ 7 ວັນ ອັນເປັນມື້ມຸງຄຸນ ໃນການອັງເຊີນພຣະພຸດທະຮູບກັບຄືນສູ່ບັນລັງເກົ່າ ເພື່ອໃຫ້ພຸດທະສາສະນິກະຊົນໄດ້ສັກກະລະບູຊາຕໍ່ໄປ.
ໃນພິທີຝ່າຍສົງ ນຳໂດຍ ພຣະອາຈານໃຫຍ່ ພອນສະຫວັນ ມະນີໂທ ຮອງປະທານອົງການພຸດທະສາສະໜາສຳພັນລາວແຂວງ ພ້ອມຄະນະສົງ, ຝ່າຍຄາລະວາດ ໄດ້ຮັບກຽດເຂົ້າຮ່ວມໂດຍທ່ານ ບຸນເຖິງ ດວງສະຫວັນ ກໍາມະການສູນກາງພັກ ເລຂາພັກແຂວງອັດຕະປື ພ້ອມດ້ວຍການນຳພັກ-ລັດ ຂອງແຂວງ ແລະ ເມືອງ
ຕະຫຼອດຮອດພໍ່ແມ່ປະຊາຊົນເຂົ້າຮ່ວມຢ່າງຫຼວງຫຼາຍ.
ໃນພິທີ ໄດ້ປະກອບມີ ການອາຣາທະນາອັງເຊີນພຣະພຸດທະຮູບອົງແສນ ຂຶ້ນສູ່ແທ່ນບັນລັງ ດ້ວຍຄວາມເຄົ້າລົບ ພ້ອມທັງປ່ຽນຜ່າບ່ຽງໃໝ່ ເພື່ອເປັນສິລິມົງຄຸນ ແລະ ສືບສານຮີດຄອງປະເພນີອັນດີງາມ, ພ້ອມກັນນັ້ນ ຍັງໄດ້ມີການສັກກະລະບູຊາ ແລະ ຖວາຍນໍ້າຫອມ ຢ່າງຄົບຖ້ວນ ຕາມພິທີທາງພຸດທະສາສະໜາ.
ພິທີດັ່ງກ່າວ ບໍ່ພຽງແຕ່ເປັນການສືບສານຮີດຄອງປະເພນີ ແລະ ສົງເສີມຄຸນຄ່າທາງຈິດໃຈ ແຕ່ຍັງເປັນການລວມໃຈຂອງຊຸມຊົນ ໃນການຮ່ວມອະນຸລັກ ແລະ ສືບທອດມໍລະດົກວັດທະນະທຳອັນດີງາມ ໃຫ້ຄົງຢູ່ຄູ່ສັງຄົມລາວຕະຫຼອດໄປ.
ຂ່າວ: ວິເດັນ