ວັນທີ 25 ເມສາ 2026 ນີ້, ທີ່ວັດຈະເລີນສຸກ, ເມືອງສາມັກຄີໄຊ, ແຂວງອັດຕະປື ໄດ້ມີພິທີແຫ່ຜ້າປ່າສາມັກຄີ ມິດຕະພາບ ລາວ-ໄທ ເພື່ອສົມທົບທຶນເຂົ້າໃນການບູລະນະວັດວາອາຣາມ ແລະ ສົ່ງເສີມພຸດທະສາສະໜາໃຫ້ຮຸ່ງເຮືອງສືບຕໍ່ໄປ.
ພິທີໃນຄັ້ງນີ້ ແມ່ນເກີດຂຶ້ນຈາກສັດທາອັນແຮງກ້າຂອງຄະນະເຈົ້າພາບທັງພາຍໃນ ແລະ ພາຍນອກ ເພື່ອສົມທົບທຶນຮອນເຂົ້າໃນການບູລະ ນະສ້າງສາລາໂຮງທໍາຫຼັງໃໝ່ ແລະ ພັດທະນາວັດວາອາຣາມ ໃຫ້ມີຄວາມສະຫງ່າງາມ, ເຈົ້າພາບສັດທາຫຼັກໃນພິທີດັ່ງກ່າວໄດ້ຮັບຄວາມເມດຕາທຳໂດຍເຈົ້າພາບພາຍໃນນໍາໂດຍ ພຣະອາຈານ ມະຫາຄໍາໃສ ທໍາມະນະຈິດໂຕນາຄໍາຈັນ, ເປັນຜູ້ນໍາພາທາງດ້ານຈິດໃຈ ແລະ ຝ່າຍສົງ, ສ່ວນຈົ້າພາບພາຍນອກນໍາໂດຍ ທ່ານ ພູຄໍາ ດວງພະບາງ, ພ້ອມດ້ວຍຄອບຄົວ ແລະ ຍາດຕິພີ່ນ້ອງ ຄະນະສັດທາຈາກປະເທດເພື່ອນບ້ານ ໄດ້ຮັບກອງຜ້າປ່າອັນເປັນມະຫາກຸສົນ, ເຊິ່ງເດີນທາງມາຈາກ ບ້ານຄໍາຍາງ, ເມືອງເພັດພີບູນ, ແຂວງອຸບົນຣາດສະຖານີ, ລາຊະອານາຈັກໄທ, ໃນນາມເຈົ້າພາບຜ່າປ່າສາມັກຄີ, ເຊິ່ງເພິ່ນໄດ້ເປັນສູນລວມຈິດໃຈໃນການເຕົ້າໂຮມເອົາສັດທາຈາກທັງຝັ່ງລາວ ແລະ ຝັ່ງໄທ ໃຫ້ມາຮ່ວມບຸນກຸສົນໃນຄັ້ງນີ້.
ບັນຍາກາດພາຍໃນງານແຫ່ຜ້າປ່າແມ່ນເຕັມໄປດ້ວຍຄວາມເບີກບານມ່ວນຊື່ນ ແລະ ຄວາມສາມັກຄີອັນແໜ້ນແຟ້ນ, ມີຂະບວນແຫ່ກອງຜ່າປ່າທີ່ຕົບແຕ່ງຢ່າງຈົບງາມ, ພ້ອມດ້ວຍສຽງກອງ, ສຽງເຊີ້ງ ແລະ ການຟ້ອນລຳຕາມຮີດຄອງປະເພນີທີ່ເປັນເອກະລັກ, ມີຄະນະສັດທາຈາກປະເທດໄທ ແລະ ອອກຕົນຍາດໂຍມພາຍໃນແຂວງອັດຕະປື ໂດຍສະເພາະຊາວເມືອງສາມັກຄີໄຊ ກໍ່ຄືຊາວບ້ານລະຍາວ ເຂົ້າຮ່ວມຢ່າງຄຶກຄື້ນ, ສະແດງໃຫ້ເຫັນເຖິງສາຍພົວພັນອັນດີງາມທາງດ້ານວັດທະ ນະທຳ ແລະ ສາສະ ໜາຂອງສອງຊາດ.
ພາຍຫຼັງຂະບວນແຫ່ເຂົ້າວັດແລ້ວ, ໄດ້ມີພິທີຖວາຍຜ້າປ່າ ແລະ ຮັບຟັງພຣະທຳມະເທດສະນາ ເພື່ອເປັນສິລິມຸງຄຸນແກ່ຜູ້ເຂົ້າຮ່ວມທຸກທ່ານ. ການຈັດງານບຸນຜ້າປ່າສາມັກຄີ ໃນຄັ້ງນີ້ ບໍ່ພຽງແຕ່ເປັນການຮວບຮວມປັດໄຈເພື່ອວັດຖຸປະສົງທາງສາສະໜາເທົ່ານັ້ນ, ແຕ່ຍັງເປັນເປັນຂີດໝາຍອັນສໍາຄັນໃນການຮັດແໜ້ນຄວາມສາມັກຄີ ລະຫວ່າງ ພີ່ນ້ອງຊາວເມືອງສາມັກຄີໄຊ ແຂວງອັດຕະປື ແລະ ພີ່ນ້ອງຈາກແຂວງອຸບົນຣາດຊະທານີ ໃຫ້ມີຄວາມໃກ້ຊິດສະໜິດສະໜົມກັນຍິ່ງໆຂຶ້ນ ໂດຍມີພຸດທະສາສະໜາເປັນຂົວຕໍ່.
ຂ່າວ-ພາບ: ວົງສະໄໝ