ໃນວັນທີ 22 ພຶດສະພາ 2026 ນີ້, ເມືອງຊານໄຊ ແຂວງອັດຕະປື ໄດ້ຈັດພິທີປະກາດສ້າງຕັ້ງຕາແສງກອງນາ ເປັນຕາແສງທີ່ 2 ຂອງເມືອງ ຂື້ນທີ່ຫ້ອງການກຸ່ມບ້ານນໍ້າງອນເໜືອ, ໂດຍເປັນກຽດເຂົ້າຮ່ວມຂອງ ທ່ານ ທະນູໄຊ ບັນຊາລິດ ຮອງເລຂາພັກແຂວງ ປະທານຄະນະກຳມະການປົກຄອງແຂວງ, ພ້ອມດ້ວຍຄະນະນຳຂອງແຂວງ, ເມືອງ ແລະປະຊາຊົນບັນເຂົ້າຮ່ວມ.
ໃນພິທີ ທ່ານ ບົວຄໍາ ຮຽງລາເຢ ຮອງເລຂາພັກເມືອງ ປະທານຄະນະກຳມະການປົກຄອງເມືອງຊານໄຊ ໄດ້ລາຍງານວ່າ: ຕາແສງກອງນາ ແມ່ນໜຶ່ງໃນສີ່ຕາແສງຂອງເມືອງຊານໄຊ ຕັ້ງຢູ່ຈຸດໃຈກາງຂອງບ້ານນໍ້າງອນເໜືອ, ຫ່າງຈາກເທດສະບານແຂວງອັດຕະປື ຕາມໄລຍະທາງຍາວ 81 ກມ, ຫ່າງຈາກເທດສະບານເມືອງ ຍາວ 51 ກມ ແລະທີ່ຕັ້ງຂອງບ້ານໄກສຸດຈາກເທດສະບານແຂວງ 111 ກມ, ຫ່າງຈາກເທດສະບານ 81 ກມ, ມີເນື້ອທີ່ຄຸ້ມຄອງທັງໝົດປະມານ 71 ພັນກວ່າເຮັກຕາ, ພື້ນທີ່ສ່ວນໃຫຍ່ເປັນ້ຂດພູດອຍກວມເອົາ 100% ຂອງພື້ນທີ່ຄຸ້ມຄອງທັງໝົດ, ມີລະດັບຄວາມສູງສະລ່ຍ 200 ຫາ 1,600 ແມັດ ທຽບໃສ່ລະດັບໜ້ານໍ້າທະເລ, ອຸນ ນະພູມສະເລ່ຍປະມານ 18-30 ອົງສາ ແລະ ມີທ່າແຮງດ້ານຊັບພະຍາກອນທຳມະຊາດຫຼາຍຢ່າງ ຊຶ່ງເປັນເງື່ອນໄຂການພັດທະນາເສດຖະກິດ-ສັງຄົມເຊັ່ນ: ມີດິນອຸດົມສົມບູນ, ອາກາດສຸມສື່ນດີ ເຊິ່ງເໝາະແກ່ການຜະລິດດ້ານກະສິກຳເປັນສິນຄ້າລາກຫຼາຍຊະນິດ ແລະອື່ນໆ. ຕາແສງກອງນາ ມີຊາຍແດນຕິດກັບ: ທິດເໜືອຕິດ ກັບ 2 ບ້ານ (ບ້ານເຕີຣບ, ບ້ານ ດາກຢອຍ) ຂອງເມືອງດາກຈຶງ ແຂວງເຊກອງ, ທິດໃຕ້ຕິດກັບ ເຊກະໝານ, ທິດຕາເວັນອອກຕິດກັບຕາແສງວັງຕັດ ແລະ ທິດຕາເວັນຕົກຕິດກັບຕາແສງນໍ້າຊຸ, ເຊິ່ງມາຮອດປະຈຸບັນ ຕາແສງກອງນາ ປະກອບມີ 10 ບ້ານ ຄື: ບ້ານນໍ້າງອນເໜືອ, ບ້ານນໍ້າງອນໃຕ້, ບ້ານໃໝ່ໜອງເສງ, ບ້ານກອງນາໃໝ່, ບ້ານດາກລະ, ບ້ານດາກປະດຸໃໝ່, ບ້ານດາກເສງ, ບ້ານດາກດາວ, ບ້ານໃໝ່ຖາວອນ ແລະ ບ້ານສຸກສະຫວ່າງ, ປະກອບມີ 1,155 ຄອບຄົວ, ມີ 930 ຫຼັງຄາເຮືອນ, ມີພົນລະເມືອງທັງໝົດ 4,906 ຄົນ, ຍິງ 2,477 ຄົນ, ມີ 1 ຊົນເຜົ່າໃຫຍ່ດຳລົງຊີວິດຢູ່ຮ່ວມກັນ (ເຜົ່າຕະຫຼຽງ ແລະ ເຜົ່າອື່ນໆຈຳນວນໜຶ່ງ), ມີແຮງງານສົມບູນ 1,819 ຄົນ, ຍິງ 967 ຄົນ, ແຮງງານສຳຮອງ 1,285 ຄົນ, ຍິງ 630 ຄົນ, ອາຊີບຕົ້ນຕໍຂອງປະຊາຊົນແມ່ນເຮັດໄຮ່ປູກເຂົ້າ ແລະ ອາຊີບອື່ນໆອີກ.
ໂອກາດດັ່ງກ່າວ ທ່ານ ບຸນເນັມ ໄຊຍະເສັ້ມ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງປະທານ, ຮອງປະທານຄະນະກຳ ມະການປົກຄອງຕາແສງກອງນາຄື: ແຕ່ງຕັ້ງ ທ່ານ ສົມຈະເລີນ ແທນລັງສີ ກຳມະການພັກເມືອງ ເປັນປະທານຄະນະກຳມະການປົກຄອງຕາແສງກອງນາ, ແຕ່ງ ຕັ້ງ ທ່ານ ວຽງສະໝອນ ແກ້ວພູວິນ ເປັນຮອງປະທານຄະນະກຳມະການປົກຄອງຕາແສງກອງນາ ແລະ ແຕ່ງຕັ້ງ ທ່ານ ພັຕ ບຸນເຕັນ ນາມມະສີກຽດ ເປັນຮອງປະທານຄະນະກຳມະການປົກຄອງຕາແສງກອງນາ ແລະ ຜ່ານຂໍ້ຕົກລົງຮັບຮອງດ້ານໂຄງປະກອບການຈັດຕັ້ງ, ຕາແສງກອງນາຄື: ມີພະນັກງານປະຈຳການທັງໝົດ 13 ທ່ານ, ໃນນັ້ນ ມີພະນັກງານລັດຖະກອນ 8 ທ່ານ, ມາຈາກກຳລັງ ປກສ ເມືອງ 2 ທ່ານ ແລະ ມີຄະນະປະກອບດ້ວຍ: ປະທານຄະນະກຳມະການປົກຄອງຕາແສງ 1 ທ່ານ, ຮອງປະທານຄະນະກຳມະການປົກຄອງຕາແສງ 2 ທ່ານ ແລະ ມີຄະນະກຳມະການປົກຄອງຄວບຕໍາແໜ່ງ ຫົວໜ້າໜ່ວຍງານ 5 ທ່ານ, ພະນັກງານຊ່ວຍວຽກ 5 ທ່ານ.
ໃນພິທີຄະນະປະທານໄດ້ຮ່ວມກັນຕັດແຖບຜ້າ, ເປີດປ້າຍ ແລະ ລັ່ນຄ້ອງ 9 ບາດ ເພື່ອປະກາດສ້າງຕັ້ງຕາແສງກອງນາ ເມືອງຊານໄຊ ຢ່າງເປັນທາງການ ເພື່ອເປັນຂີດໝາຍແຫ່ງການພັດທະນາເສດຖະກິດ-ສັງຄົມຂອງທ້ອງຖິ່ນໃຫ້ເຂັ້ມແຂງຍິ່ງໆຂຶ້ນ.