ວັນທີ 29 ພຶດສະພາ 2026 ທີ່ຫໍປະຊຸມໃຫຍ່ແຂວງອັດຕະປື, ໄດ້ຈັດພິທີສະເຫຼີມຫຼອງວັນເດັກນ້ອຍສາກົນ 1 ມິຖຸນາ ແລະ ວັນສົນທິສັນຍາວ່າດ້ວຍສິດທິເດັກ ຫຼື ວັນເດັກໂລກ 20 ພະຈິກ ຕິດພັນກັບວັນປູກຕົ້ນໄມ້ແຫ່ງຊາດ ແລະ ວັນສິ່ງແວດລ້ອມໂລກ ປະຈຳປີ 2026 ຂຶ້ນຢ່າງຄຶກຄື້ນ ທ່າມກາງບັນຍາກາດແຫ່ງຄວາມຮັກແພງ ແລະ ຄວາມເອົາໃຈໃສ່ຕໍ່ເດັກນ້ອຍ.
ກ່ອນເຂົ້າສູ່ພິທີ, ຄະນະນຳແຂວງ ໄດ້ເຂົ້າຮ່ວມກິດຈະກຳປູກຕົ້ນໄມ້ ຢູ່ໂຮງຮຽນປະຖົມເຊກອງ ໂດຍມີ ທ່ານ ບຸນເຖິງ ດວງສະຫວັນ ກຳມະການສູນກາງພັກ, ເລຂາພັກແຂວງອັດຕະປື ເຂົ້າຮ່ວມມີການນຳພັກ- ລັດ ຂັ້ນແຂວງ ແລະເມືອງ, ພ້ອມດ້ວຍຄອບຄົວການນຳ ແລະ ຫຼານນ້ອຍເຍົາວະຊົນ ເຂົ້າຮ່ວມຢ່າງພ້ອມພຽງ.
ກິດຈະກຳດັ່ງກ່າວ ມີຈຸດປະສົງເພື່ອຮ່ວມກັນສ້າງສີຂຽວໃຫ້ແກ່ສັງຄົມ ແລະ ປູກຝັງຈິດສຳນຶກໃນການອະນຸລັກທຳມະຊາດ ແລະ ສິ່ງແວດລ້ອມໃຫ້ແກ່ເດັກນ້ອຍ ແລະ ເຍົາວະຊົນ.
ຈາກນັ້ນ, ຄະນະນຳ ແລະ ແຂກຖືກເຊີນ ເຂົ້າຮ່ວມພິທີທີ່ຫໍປະຊຸມໃຫຍ່ຂອງແຂວງ ໂດຍມີ ທ່ານ ສີໄລ ສີສະແຫວງສຸກ ຄະນະປະຈຳພັກແຂວງ, ຮອງປະທານປົກຄອງແຂວງ ເປັນປະທານໃນພິທີ. ພາຍໃນງານ ບັນດາຜູ້ເຂົ້າຮ່ວມ ໄດ້ຮັບຊົມການສະແດງສິລະປະ 3 ລາຍການ ຈາກນ້ອງນ້ອຍເຍົາວະຊົນ ທີ່ສ້າງສີສັນ ແລະ ບັນຍາກາດອັນເຕັມໄປດ້ວຍຄວາມສົດໃສ ແລະ ມ່ວນຊື່ນ.
ໃນພິທີ ທ່ານ ນາງ ຈັນເພັດ ຈັນທະມາດ ກຳມະການພັກແຂວງ, ປະທານສະຫະພັນແມ່ຍິງແຂວງ ໄດ້ຜ່ານປະຫວັດຄວາມເປັນມາຂອງວັນເດັກນ້ອຍສາກົນ ໂດຍເນັ້ນໃຫ້ເຫັນຄວາມສຳຄັນຂອງເດັກ ໃນຟານະເປັນອະນາຄົດຂອງຊາດ, ເປັນໜໍ່ແໜງສຳຄັນທີ່ຈະສືບທອດ ແລະ ພັດທະນາປະເທດຊາດໃນອະນາ ຄົດ. ພ້ອມນັ້ນ ຍັງໄດ້ເນັ້ນໜັກເຖິງການສົ່ງເສີມ, ພັດທະນາ ແລະ ປົກປ້ອງສິດທິເດັກ ໃຫ້ເດັກທຸກຄົນ ໄດ້ຮັບການດູແລ, ສຶກສາ ແລະ ເຕີບໃຫຍ່ໃນສະພາບແວດລ້ອມທີ່ປອດໄພ ແລະ ມີຄວາມຜາສຸກ.
ໂອກາດດັ່ງກ່າວ ທ່ານ ສີໄລ ສີສະແຫວງສຸກ ໄດ້ຜ່ານເອກະສານອວຍພອນເນື່ອງໃນວັນເດັກນ້ອຍສາກົນ ໂດຍລະບຸວ່າ ວັນເດັກນ້ອຍສາກົນເປັນວັນແຫ່ງຄວາມສຸກ ແລະ ຄວາມເບີກບານຂອງເດັກນ້ອຍ ພ້ອມທັງເປັນໂອກາດໃຫ້ສັງຄົມ ໄດ້ຮ່ວມກັນຢືນຢັນຄວາມສຳຄັນ ຂອງການສົ່ງເສີມ ແລະ ປົກປ້ອງສິດທິເດັກ. ພ້ອມກັນນີ້ ທ່ານຍັງໄດ້ເນັ້ນວ່າ ການຈັດກິດຈະກຳຄວບຄູ່ກັບວັນປູກຕົ້ນໄມ້ແຫ່ງຊາດ ແມ່ນເພື່ອປູກຝັງໃຫ້ເດັກນ້ອຍ ມີຄວາມຮັກ ແລະ ຮູ້ຈັກຮັບຜິດຊອບຕໍ່ການອະນຸລັກທຳມະຊາດ ແລະ ສິ່ງແວດລ້ອມຕັ້ງແຕ່ຍັງນ້ອຍ. ພາຍໃນພິທີ ຍັງມີກິດຈະ ກຳຖາມ-ຕອບວິທະຍາສາດ, ການສະແດງລະຄອນສັ້ນ ແລະ ການມອບຂອງຂວັນໃຫ້ແກ່ເດັກນ້ອຍ. ພ້ອມນັ້ນ ຄະນະປະຈຳ ໄດ້ຮ່ວມຢອດຢາ ແລະ ມອບຂອງຂວັນໃຫ້ແກ່ເດັກນ້ອຍທີ່ເຂົ້າຮ່ວມງານ.
ຂ່າວ: ສ.ໄຊຄຳສອນ